pisaq qaqutigoortoq
Assit: Ikerasaarsummi qaqortumik tulugarput
Hans Japhet Filippussen pingasunngornermi ullup qeqqata missaani qaqortamik tulugarpoq
Kalaallit oqariaaseqarpugut: Tulukkat qaqortippata, pissutsit piunnartutut ilimaginngisat oqallisigineqaleraangata. Maannali tulukkamik qaqortamik nunaqarfimmi Ikerasaarsummi Kangaatsiap eqqaani pisaqartoqarpoq.
Nunaqarfimmi Ikerasaarsummi pingasunngornermi tusatsiakkamik siaruaalertortoqarpoq tulugaq qaqortaq nunaqarfimmut pimmat tassanilu inuunini naggaserlugu.
Uppernarsaat
- Eqqarsarama uumatiinnassagutsigu takoqqinnaviarnagu. Taamaammat takusimanera uppernarsarsinnaajumallugu pisarivara, aalisartoq Hans Japhet Filippussen Sermitsiaq.AG-mut oqaluttuarpoq.
Ikerasaarsummi tulukkat takussaajuartuupput taamaattorli tulukkamik qaqortamik Hans Japhet Filippussen takusimanngisaannarnerarpoq.
- Qanoq iliussanerlugu isumaliutigerujoorparput. Maanna qeritikkallaannassuarput, pisani qaqutigoortoq pillugu oqarpoq.