Sermersuumi nerisassiorneq
Assit: Igasunut ilinniarsimanngitsunut tunumi unammisitsineq
Ajugaasut marluk Tasiilameersut Ittoqqortoormiuneersullu Sermersuup Food Festivalertitsinerani. Paamiuni unammisitsineq taamaatiinnarneqarpoq
Nuummi oqalugiartut, suliffeqarfiit takutitsisut, igasut unammisitsinneqarnerisa nalaanni taamaallaat igasunik ilinniarsimanngitsunik arfininngornermi unammisitsinerit Kommuneqarfik Sermersuup illoqarfiisa sinnerini, Tasiilami, Ittoqqortoormiuni Paamiunilu, nerisassanik saqqummersitsinermi pilersaarusiorneqarsimapput.
Paamiuni pilersaarutit taamaatiinnartariaqarsimapput unamminiarlutik nalunaartut taamaatiinnarsimammata, taama Sermersuumi Inuussutissarsiornermik Siunnersuisooqatigiit Sermitsiaq.AG-mut nalunaarput.
Kommuneqarfik Sermersooq Foodfestival 2014-imi aaqqissuussinerit assigiinngikkaluaqisut Ittoqqortoormiuni unammisitsineq nuannaarutigineqarpoq, taama ilisimatitsivoq Ittoqqortoormiuni ataqatigiissaarisoq Lone Milling-Rohleder.
Ukiup tullissaanut qilanaalereerpugut. Nuannisaqaagut, aggiasut amerlapput, unammisullu nerisassaataat ooqattaarlugit, taama Lone Milling-Rohleder oqaluttuarpoq.
Ittoqqortoomiuni Dorthe Bidstrup ajugaavoq. Tasiilami Åge Umerineq.
Tallimanngormat illorsuarmi kultureqarfiusumi Katuami Nuummiittumi suliffeqarfiit mikisut angisuullu nunatta pissarititai nerisassat takutissorpaat. Arfininngornikkut igasunik ilinniarsimanngitsunik unammisitsineqarpoq, sapaatikkullu igasunut ilinniarsimasunut unammisitsineqarluni.
Taakku saniatigut naatitassiarineqarsinnaasut pillugit Nuummi oqalugiartoqarpoq. Aaqqissuussinerlu tamarmi nunatsinni pissarititat nerisassat qitiutinneqarput.
Assit ataani takukkit