Greenland Eyes Film Festival
Assit: Greenland Eyesimi Sume pillugu filmi kingullersaalluni takutinneqarpoq
Sume pillugu piviusulersaarusiami ilitsersuisut Emile Peronard aamma Inuk Silis Høegh filmi Katuami takutinneqarmat najuupput
Greenland Eyes International Film Festival 2014 Katuami pisoq pingasunngornermi naammassineqarpoq. Filmi kingulleq takutinneqartoq sunaanersoq takutinneqannginerani isertuunneqaqqaarpoq.
Takutinneqarpoq Sume - Mumisitsinerup nipaa. Tassani nipilersortartut 1972-mi aallartittut Sume piviusulersaarusiorneqarpoq. Filmi septembarip qulingani takutinneqassaaq aamma.
Sume pillugu piviusulersaarusiami ilitsersuisut Emile Peronard aamma Inuk Silis Høegh kulturikkut illorsuarmi najuupput isiginnaaqataallutik. Takutinneqartoq naammassimmat ilitsersuisut ersaattaanneqarput.
Filmit takutinneqartut amerlasuut
1972-mit juunip arferngani 1975-ip tungaanut pisut sammineqarput, akornannimi
1973-imi, 74-imi 75-imilu saqqummersitsipput.
Nipilersoqatigiinni ilaasortaasut apersorneqarput, TV-ikkut aallakaatitanik takutitsisoqarpoq, nammineq sanaat ilaat takutinneqarput kiisalu Namminersornerulernerup nalaani taalliat aamma saqqummiunneqarlutik.
Filmi sanalluagaavoq, apersuinerit nipilersornerillu ataqatigiissaalluagaallutik. Filmi tamaat assigiiaalinngilaq.
Sume sunniuteqarluartoq
Filmimi tikkuartuinngikkaluarluni akerleriissutigineqartut saqqummersinniarneqarput. Ullumimut naleqquttorujussuullunilu qanilaarpoq, 1970-ikkunnilu pisut paasinarsarluarneqarlutik.
- Sumep 1970-ikkunni politikkikkut sunniuteqarnera ingasaanneqarsinnaanngilaq, tamanna aamma ilitsersuisunit anguniarneqartoq malunnarpoq.
Saammaasseqatigiinnissaq aamma ilaatigut filmimi eqqartorneqaqqippoq.
Tikkuartuinnginneq
Inuiaat akerleriinnerat filmimi ersersinneqanngilaq. Kalaallit Nunaata inooriaatsimut nutaanerusumik ikaarsaariartornera sammineqarpoq, tamannalu filimimi takuneqarsinnaavoq. Danskit ukiut 40-t matuma aalajangigaat maleqqissaarneqartariaqarunnaarput.
Filmimi ersersinneqarpoq Kalaallit Nunaat ukiuni 40-ni kingullerni siuariartorsimasoq annertuumik. Filmi sanalluagaasorujussuuvoq, festivalinilu assigiinngitsuni takutinneqarnissaa neriunnarpoq.