assammik arsarneq
Assit: GOG-mi unammisartut sæsonimut tamaviannguat sungiusarput
Suli Akutaaneq Kreutzmann unammisartoralugu GOG-mi assammik arsartartunut ulluinnaat atugaaleqqipput. Aatsaalli sapaatip akunnerata tulliani unammeqqaassapput
GOG-p sungiusaasuunerata Jakob Larsenip, sæsonip nutaap aallartilernerani unammisartuni sungiusartinnerat siulleq Odensemi Syddansk Universitetimi Insitut for Idræt og Biomekanik-imi ingerlatsippaa. Unammisartut ullaakkut ualikkullu sungiusartarput, tamaviannguallu sungiusarput. Atletik-ertarfimmi maskiinanilu sungiusaatini assigiinngitsuni, ilisimatusarfiup ilaani atortorissaartorujussuarmi.
Arpattaqaat
Assammik arsarluni sukalanerpaani unammisartut arpaqattaartorujussuusinnaassapput, sæsonimullu unammisaqattaartarfioqisumut timikkut qasusuitsuulluinnartariaqarpoq, tamannalu GOG-mi unammisartut tunngavilersuleruttorpaat.
– Unammisartut puaat nutaamik silaannalersussavagut, sungiusaasuat Jakob Larsen Sermitsiaq.AG-mut oqarpoq nangillunilu:
– Aasaanerani feeriarneq akeqanngitsoorneq ajorpoq. Unammisartut qasusuissusermik 40 procentiat annaasinnaavaat. Qujanartumik sukkasuumik tamanna angoqqinneqarsinnaavoq. Anguniarnerali annernanngitsuunngilaq.
Annernarnera Sermitsiaq.AG-p aallartitaata takusinnaalluarpaa. Arpattarfimmi sukkatseqattaarluni sakkortuumik sungiusarnerup kingorna unammisartut arlallit minutsini arlalinni oqalussinnaanngillat. Unammisaertut aatsaat saapaatip akunnerani tullermi unammeqqaassapput.
Programmi sakkortooq
GOG siullermik pingaarutilimmik unammissaaq aggustip 26-anni. Pokalinnanniunnermi 1/8-finalimi Randers HH unammissagamikku. Ligami unammineq siulleq pissaaq aggustip 31-anni, Team Tvis Holstebro unammissallugu, tamatumalu kingorna unamminerni tamaviaarnartuni Sønderjyske aamma KIF Kolding København unammissa vaat.
Tamakkua pitinnagit klubbi arfineq-marloriarluni sungiusarluni unammisassaaq, unammisartullu ulluni sisamani, juulip 30-annit aggustip 2-annut sungiusaqatigiissapput. Taamaattumik Minik Dahl Høegh, Akutaaneq Kreutzmann aamma Jakob Larsen aggustip aallaqqaataani Tivolimi peqataasinnaanngillat.
GOG aasakkut unamminngiffeqarnermi unammisartuni sisamanik ilasimavai. Minnerunngitsumik norskit marluk nunanut allanut unammisartut, målmandi Espen Christensen stregimiittartorlu Henrik Jakobsen malinnaaffigalugit pissanganassapput.
Akutaaneq Kreutzmann suli GOG-miippoq
Sapaatit akunnerini arfinilinni nunatsinneereersimalluni Akutaaneq Kreutzmann sæsonimut nutaamut piareerpoq. Sermitsiaq.AG-p siusinnerusukkut allaaserisaatut Akutaaneq Kreutzmann franskit klubbiannik Evry-mik isumaqatigiinniuteqarsimavoq. Isumaqatigiinniarnerit maangaannarput, Akutaaneq Kreutzmannilu GOG-mi ingerlaannassaaq.
Akutaaneq Kreutzmann Sermitsiaq.AG-mut oqaluttuarpoq:
– Frankrigimi unammisartunngornissara tamatumuuna piviusunngunngilaq. Oqaloqatigeeqattaartarsimavugut, paasinarsivorlu Ivry uannik isumaqatigiissuteqarnissaminut aningaasassaqanngitsoq. Taarsiullugu unammisartumik allamik attartorput. Taamaattumik GOG-miiginnassaanga. Sæsonimut tullermut isumaqatigiissuteqarpugut. Sæsonimullu unammiuaarfissamut qilanaaqaanga.
Assit ataani takukkit