assammik arsarnermi GM
Assit: GMip Nuummi ammarneqarnera
Arnani iligiit tallimat angutinilu iligiit arfineq marluk assammik arsarnermi inersimasut pissartanngorniunneranni peqataapput
Unamminerit ilungersorfiusut pisussaapput ilaatigullu dommerit akuerisinnaasaat sipporlugu iliortoqartarumaarluni assammik arsarnermi inersimasut Nuummi pissartanngorniunneranni. Kommuneqarfik Sermersuumi borgmesterip tullia siulleq Anda Uldum Demokratineersoq kajumissaarivoq timersortartorpalaartumik pissuseqarnissamut assammik arsarnermi GM ataasinngornermi ammaramiuk.
GM pisortatigoortumik ataasinngornermi Nuummi ammarneqarmat iligiit peqataasussat amerlanerit apuutereersimapput. Nagdlúnguup Ilulissaneersup aamma SAKp Sisimiuneersup angutitaat kingusinnerusukkut aatsaat tikipput.
Unamminerit siulliit ataasinngornermi pimmata anisitsinerit mianersoqqussutinillu nittaasarnerit pipput taamaasilluni takuneqarsinnaalluni isertitseriarsinnaajumalluni tamaviaartoqartartoq.
- Sungiusarluarsimaneq aammalu ukioq naallugu sungiusarsimaneq amerlanertigut pitsaasumik angusaqarfiusartut nalunngilarput. Taamaammat ilissi timersortartut ulluni tulliuttuni timersortartorpalaartumik pitsaasumik angusaqarnissassinnik kissaappassi. Eqqaamallugu timersortartorpalaarneq unamminernik kusanarninngortitsisarpoq aamma ataqqeqatigiinnermik ikinngutigiilernermillu kinguneqartarluni, Anda Uldum oqarpoq.
Arnani peqataasut tassaapput: GSS aamma NÛK Nuummiik, Kâgssagssuk Maniitsumiik, SAK Sisimiuniik aamma Nagdlúnguak Ilulissaniik.
Angutini peqataasut tassaapput: K-33 Qaqortoq, GSS aamma NÛK Nuuk, SAK Sisimiut, Norsaq HC Aasiaat, Nagdlúnguaq Ilulissat aamma QNQ Qaanaaq.
GM sapaatiuppat naammassissaaq unamminerillu tamarmik Inussivimmi pissapput.