Assit: Bibi Chemnitz-ip ukiuni marlunni suliarisimasani saqqummiukkai

Atisanik takutitsinermi Nordic Fashion Biennal pingajussaa ingerlanneqarpoq. Nunarput sinnerlugu atisaliortartoq Bibi Chemnitz peqataavoq. Atisanik takutitsineq Tysklandimi Frankfurt-imi pisumi Bibi Chemnitz-ip ukiuni marlunni suliarisimasani saqqummiuppai.

Ilaatigut Kopenhagen Fur aamma Great Greenland suleqatigalugit atisaliortarpoq, arnaq angullu puisip amiinik atortut takutitsinermi ilaatinneqarlutik, Bibillu ullumikkumut aamma tulluarsakkanik aamma suliani takutillugit.

Franfurt-imi takutitsinermi Bibi Chemnitz aappassaa peqataavoq.

Peqataanini tulluusimaarutigaa
- Takutitsinermut kusanartumut peqataalluni torraqaaq, nunarput sinnerlugu aamma peqataagama tulluusimaarpunga, suliaqarninnimi nunarput annertuumik sunniuteqartarpoq, Bibi Chemnitz tusagassiutinut nalunaarummi oqarpoq.

2013-ip aasaanerani Nuup eqqaani assiliisaqattaarput, tassani assilisittartut kalaallit Bibip atisaliaanik atorlutik assilisillutik. Sila atoruminarpallaanngitsoq assiliinerit ingerlanneqarput.

- Assiliisartut Cooper & Gorfer suleqatigalugit assiliinerit ingerlanneqarput, Kopenhagen Fur aamma Great Greenlandimillu aamma suleqateqarneq ingerlalluarluni. Kalaallit naleqassusaat assiliinerni takutinneqarniartoq iluatsilluarpoq.

Juunip tungaanut Bibi Chemnitzip atisaliai Frankfurtimi takuniarneqarsinnaapput, taanna pereerpat Den Sorte Diamandimi Københavnimiittumi takutitassiarineqassallutik. Nunarsuup sinneranut takutitassiarineqarnissaat anguniarneqarpoq.

Takutitsineq ilutigalugu atuagaq 'The Weather Diaries' saqqummersinneqarpoq, aammalu takutitassiamik filmimik isiginnaartoqarsinnaassalluni.

Assit ataani takukkit