nuannarinneqisoq
Assit atorlugit anguniagalik: Taamaattumik inuit 1.000-it assiliortorpai
Deep Purple-kkut saqqummersitaannik Made in Japan box set-imik tigumiartunik 1.000-nik assiliinissamik siunnerfik Hans Peter Kleemannip naammassivaa
Deep Purplekkunnik nuannarinnittup Hans Peter Kleemannip nipilersoqatigiit nuannarilluakkami Nuummukartinnissaat anguniarpaa. Nuummukarnissamut kajumissaarut Deep Purplekkut manageriannut nassiutereerpaa aammalu Facebookimi assiisivimminut 1.000-nik assitalimmut linki ilanngullugu nassiutereerlugu.
Hans Peter Kleemannip Deep Purple-kkut nuusiaata Made in Japan box setip puuanik unermilluni Nuummi angalaarsimanera malugineqarluarpoq. Tassami inuit nuussuup puuanik tigumiartillugit assilisaarpai assillu 1.000-it assiisivimminut ikkullugit.
Inuit assiliseqataajumapput
- Anguniagalimmik aallartinngikaluarpoq. Deep Purplekkunnik nuannarinnittutoqaavunga apriilimilu Deep Purple Made in Japan box set saqqummermat pisiaraara. Kinguninnguna ernutara ilagalugu nuussuup saqqaa tigumiarlugu assilisippunga aammalu aqaguani suleqatima ilaat tassannga tigumiartillugit assilillugit, Hans Peter Kleemann Sermitsiamut oqaluttuarpoq aallartitani annertusiartulertorsimasoq pillugu.
Sivitsunngitsoq Facebookimi assiisiviliornermut siunertaasinnaasumik isumassarsivoq.
- Siunniuppara nuussuup puuanik tigumiartut inuit assigi 1.000-it anguniarniarlugit. Anguneqarsinnaanngitsutut ittumik imminut anguniagalerpunga nuannernerussammat. Kisianni taava soqutigineqarlualerpoq allaat inuit saaffiginnittalerlutik assiisivimmi peqataajumasut, Hans Peter Kleemann oqarpoq.
Deep Purple pakatsisitsivoq
Isumassarsiarlu inereqqeriarmat Hans Peter Kleemann isummerpoq Deep Purplekkunnut saaffiginninniarluni tassanilu aperalugit Nunatsinnukarusunnginnersut aammalu tamaani nipilersortartut sammisaqaqatigalugit.
- Assiisivimmi assit 1.000-issaat ikkummat Deep Purplekkut manageriat allaffigaara. Kisianni pakatsivunga Deep Purplekkut suli akissuteqanngimmata. Naatsorsuisinnaanera malillugu Nunatta inuisa 5,6 procentii assiisivimmi tassani peqataapput. Tupinnartuliaasimassagaluarpoq USAp inuisa 5,6 procentii assiisivimmi taamaattumi peqataasuuppata, Hans Peter Kleemann oqarpoq.
Taanna neriukkaluarpoq Deep Purple Nuummi tusarnaartitsissasut aammalu nipilersortartut sammisaqaqatigalugit. Piffissallu takutikkumaarpaa nipilersoqatigiit taakku 1968-mili aallartittut Nuummukarumaarnersut.
- Maanna takutereerpara inuusuttuniit soraarnerit tikillugit soqutigineqartut. Neriuinnarsinnaavugut, Hans Peter Kleemann oqarpoq.