umiarsuit takornariartaatit
Assit: Artania umiarsuit Sisimiunut talittut annersaat
Arfininngormat erinarsoqatigiit Noqarteq umiarsuarmi takornariartaami Artaniami tusarnaartitsipput
Umiarsuup takornariartaatip Artaniap, umiarsuaatileqatigiiffimmit Phoenix Reisen-imeersup, arfininngormat pilersaarutigineqartut Kangerlussualiarnissani taamaatiinnarpaa silarlunnera pissutigalugu. Taarsiullugu umiarsuaq 975-it missaannik ilaasulik - amerlanerpaamik 1200-t ilaasorisinnaavai - Sisimiuliarpoq, sapaammi aggustip 10-anni aatsaat tikittussaagaluarluni.
Inuit ilaat uissuummisimassapput umiarsuaq kigaatsumik umiarsualivimmut pulammat talittarfittaamullu talilluni. Siorna Albatros, Phoenix Reisen-imeersoq, 200 meterit missaannik angissusilik arfininngorneq tikillugu umiarsuit Sisimiunut talittut annersaraat.
Artaniali 231 meterinik takissusilik, mannalu tikillugu umiarsuit Sisimiunut tulattut annersaralugu. Sarfaq Ittuup arfininngormat unnukkut Artania saneqquppaa, angissutsimigullu nikingassutaat malunnartorujussuuvoq, Ivik Ostermann-Knudsen, Greenland Cruises-imeersoq, oqaluttuarpoq.
Sapaammi assigiinngitsunik sammisaqartisisoqarpoq illoqarfimmut pisuttuarnernik, bussimik angalaarnernik, timmisartornermik. Arfininngorneq naggaserneqarpoq qaannamik takutitsinermik.
Arfininngornikkut unnukkut umiarsuaq ilaasuilu erinarsoqatigiinniit Noqarteq pulaarneqareput, marloriarlutillu tusarnaartitsereerlutik umiarsuup neriniartarfiisa ilaannut qaaqquneqarput.
Sapaammi umiarsuaq takornariartaat allat Sisimiunut tikippoq, tassalu Silver Explorer, 120-t missaannik ilaasulik. Taamaattumik sapaatiummat illoqarfik takornarianit tikeraarneqarpoq Qeqertarsuarmi innuttaasut amerlaqataannik amerlatigisunik, Ivik Ostermann-Knudsen naliliivoq.
Takornariarpassuillu umiarsuarnut taakkununnga marlunnut ilaasut sapaami angalaartinneqartussaapput, taamaattumik Ivik Ostermann-Knudsen Greenland Cruises-imeersoq, ulapippoq.
Talittarfimmi umiarsuarnut takornariartaatinut marlunnut inissaqanngilaq, taamaatumik Silver Explorer orsersortussanngormat Artaniap talittarfik qimattariaqarpaa. Artania umiarsualiviup avataanut avalattariaqarpoq, tamanna peqatigalugu umiarsuaq containerersuut Sisimiuniimmat. Taamaattumik Artania avalappoq, takornariallu nunamiissimasut takornarianut talittarfik puttasoq atorlugu umiarsuarmut takornariartaammut ikaanneqarput.
Artania ingerlaqqereerpoq ataasinngornermilu aggustip 11-anni Qeqertarsuarmut tikissalluni.