københavn
Assit amerlanerit takukkit: Sermeq naajuk, naalaaruk takullugulu
Taamatut oqarpoq eqqumiitsuliortoq Olafur Eliasson, sapaatiummat eqqumiitsuliani aakkiartuaartoq ´Ice Watch´københavnermiunut takutikkamiuk
Københavnermiut untritillit arlallit najuupput silap pissusianut nukissaqarnermullu ministerip Rasmus Helveg Petersenip, Radikale Venstre, eqqumiituliaq ´Ice Watch´ ammarmagu, taannalu serminik blokkinik 12-nik sanaajuvoq, qulaanillu isigalugu nalunaaqutarujussuartut isikkoqarpoq.
Sermit blokkit katillugit 100 tonsit, Royal Greenlandip Nuummit Aalborgimut umiarsuaassimasai, Rådhuspladsimi 12-it iloqqasunngorlugit ilioqqarneqarput.
– Sermeq 100 tonsi maaniittoq sermimut Kalaallit Nunaanni 1/100 sekundimut aattartumut naapertuuppoq. Kiatsikkiartorpoq nunarsuarmilu immat qaffakkiartorput, Rasmus Helveg Petersen oqarpoq.
– Nukissiuutit nunap ataaneersut aamarsuit, uulia gas-ilu anorisaatinit, seqinermit biomasse-nillu nukissamik taarsertariaqarpavut, silap pissusianut ministeri oqalugiarnermini kajumissaarivoq.
Aatsaat taamaasiornitsigut uagut inuit, silap pissusiata allanngoriartornera unitsissinnaavarput, ministeri isumaqarpoq.
FN-ip silap pissusianut panel-ia Københavnimi ataatsimiissaaq
Ataasinngorpat FN-ip ilisimatuunik nunarsuarmit tamarmeersunit silap pissusianut panel-ia ataatsimiilissaaq silap pissusiata allanngoriartornera oqaluuserissallugu. FN-ip silap pissusianut panel-ia, IPCC, naapertorlugu sapaammi novembarip 2-anni kinguneqaatinut nalunaarusiaq annerpaamik 30-nik quppernilik saqqummiunneqassaaq, taannalu silap pissusianik nalunaarusiarsuarnit issusuunit pingasunit, nunarsuarmi tamarmi ilisimatuunit allanneqarsimasunit, eqitigaavoq.
´Ice Watch´-imik sanasut tassaapput eqqumiitsuliortoq nunarsuaq tamakkerlugu tusaamasaq, islandimiu eqqumiitsuliortoq Olafur Eliasson ujarassioorlu Minik Rosing.
– Sermeq aakkiartortoq naalaaruk, Minik Rosing kajumissaarivoq.
– Silaannaap partikelii mikisut maanngaanniit silaannarmut aniasinnaapput. Pullartaaqqat tamakku ukiunik tusintinik arlalinnik pisoqaassuseqarput, nunarsuaq allaanerusumik CO2-qarallarmat, ilisimatooq oqarpoq.
Eqqumiitsuliortup Olafur Eliassonip allaat sermit eqitaarnissaannik kajumissaarivoq.
– Sermeq eqitaadruk aakkiartorneralu tusaallugu, Eliasson oqarpoq.
– Silap pissusia pillugu nalunaarusiat atuarneqarneq ajorput, uanga nammineq atuarneq ajorpakka. Malugisinnaavarali, takusinnaallugu tusarsinnaallugulu sermeq aakkiartortoq, ilississaaq kajumissaassavassi tamanna maani malugeqqullugu, eqqumiitsuliortoq oqarpoq.
Biilernak sikkilertarit
Københavnip teknikkimut avatangiisinullu borgmesteriata Morten Kabell-ip, Enhedslisten, inuit eqqarsarnerusaqqullugit kajumissaarpai.
– Isumaqarpunga ullumikkuminngarnit annertunerusumik nukissamik sipaaruteqarsinnaasugut. Qulliit atunngikkaangatsigit qamittassavagut. Igalaat matullugit kiak sipaarlugu. Sikkilertassaagut biilernermut taarsiullugu, borgmesteri oqarpoq.
– Tamatuma saniatigut Københavnip sulissutigaa 2025-imi nunarsuarmi illoqarfiit pingaarnersaasa CO2-qanngitsut siullersarilissagaani. Illoqarfilli kisimiilluni iliuuseqarsinnaanngilaq, taamaattumillu pingaaruteqarpoq silap pissusianut panel-ip inerniliinerisa tusarniarnissaat, Morten Kabell oqarpoq.
Assit ataani takukkit