Arsaannermi GM
Assit: Aajuku angutit arsaannermi GM-rnissaanni puljet
Arsaannermi angutit GM-qarnissaannut puljenut marlunngornermi makitsisoqarpoq
Angutit arsaallutik pissartanngorniutilerpata ammaalluni unamminermi NÛK Nuummiik aamma G-44 Qeqertarsuarmiik unammissapput. GM-ip naggataarneqarnissaanut ataasinngorpat aallartittussamut puljenut makitsinerup kingorna tamanna paasinarsivoq.
Atuaruk: Arsaannermi GM: IT-79 GM-imut annguppoq
NÛK-miutoq Sven Petersen makitsisuuvoq NÛKp arsaannermut immikkoortoqarfianiit Inuaraq Petersen, Jeremias Jeremiassen aamma Arne Hansen nakkutilliisut GBUp siulittaasua John Thorsen aamma najuuttoralugu makitsineq timersortartut illuanni Nuummi pimmat.
Agguataarluarput
Pulje 1-imiissapput Eqaluk 54 Tasiusaq, B-67 Nuuk, Nagdlúnguak Ilulissat aamma IT-79 Nuummiik.
Pulje 2-miissapput TM-62 Kulusuk, FC Malamuk Uummannaq, NÛK Nuuk aamma G-44 Qeqertarsuarmiik.
Ileqquuvoq klubbip aaqqissuisup ammaanermi unammisuusarnera. Ukiunik 80-nngortorsiorluni aaqqissuisoq NÛK ammaanermi G-44-mut Qeqertarsuarmeersumut unammissaaq ataasinngorpat nalunaaqutaq 13.00.
Peqataasussat puljenut agguataarluarmata pulje sorleq sakkortunerunerunersoq GBU-mit oqaatigiuminaatsinneqarpoq.
- Assut agguataarluarput. Ilimanareerpoq B-67, Nagdlúnguak, G-44 immaqalu aamma NÛK pikkorinnerit akornanniissasut. Soorunami aamma unammersuarnerni tupaallannartoqartuaannartarpoq, GBU-mi siulittaasoq John Thorsen Sermitsiaq.AG-mut oqarpoq.