juullip nipitittagaa 2013
Assit: 2013-mi Juullip nipitittagaa ilisaritinneqarpoq
Ukiormanna juullip nipitittagaa eqqumiitsuliortup inuusuttup Lisbeth Poulsenip titartagaraa
Nukappiaraq qamutini nuannaaqaluni qamutini uniartittoq igalaanilu ulloriarpassuit.
Tassaapput ukiormanna juullip nipitittagaani assiliartaasut eqqumiitsuliortumit Lisbeth Poulsenimit titartarneqarsimasumi. Juullip nipitittagaa kulturip illorsuani Katuami ilisaritinneqarpoq juullerpaluttunik erinarsortoqartarluni eqqaamasanillu qalluisoqarluni.
Tassami juullip nipitittagaa 40-ussaa saqqummerpoq. Julemærkekomitep siullerpaap ilaasortaasa ilaata Aqqaluk Lyngep juullip nipitittagaa siullerpaaq Jens Rosingimit titartarneqartoq pillugu oqaluttuarpoq.
Juullip Nunatsinni ilisarnaatigisagai ukiut ingerlaneranni juullip nipitittagaani ersersinneqartarsimapput. Ukiormanna aamma taama pisoqarpoq.
Meeraanermi eqqaamasat aput qamutertarnerillu eqqarsaatiniissimapput Lisbeth Poulsenip juullip nipitittagaa titartarmagu.
- Kalaallit juullertarnerat tassaana nuannersoq, apisimalluni taarlæuni juullip ulloriarpassuit igalaani takussaasut. Juulleriartornerani angerlartillunga takuara meeraq qamutinik uniartittoq. Eqqaavakka meeraaninni qamutertarnikka, qamuteqarluni pilluarnaqaaq. Eqqaamavara aqqalussama kiinaa qamutit tunissutisiani puiaramigit, Lisbeth Poulsen juullimut nipitittagaliani pillugu oqaluttuarpoq.
Juullip nipitittagaata ilisaritinneqartarnerani erinarsoqatigiit Nipe peqataajuartartut aamma pingasunngornermi ualikkut taamaasiorput. Immikkut aamma erinarsortut tassaapput Josef Josefsen aamma Katsi Kleist erinarsoqatigiittut.