Politikeri angalasoq
Assigiinngissuteqartitsisimavugut
Inuit Ataqatigiit Folketingimut ilaasortaatitaat Johan Lund Olsen Kalaallit Nunaanni paasisitsiniaalluni angalavoq. Qanittukkut Tasiilap nunaqarfiisa ilaanni Tiniteqilaamiippoq 120-nik inulimmi
– Angalaneq manna angalanerit qilanaarinerpaasamma ilagaat. Allaavoq qallunaat inatsisartuanni Kalaallit Nunaannik sullissineq, allaallunilu angalalluni qinersisartut naapinnerat toqqaannartumillu oqaloqatigalugit, namminerlu isinik ulluinnarni suliarisartakkavut takullugit. Folketingimi sulinitsini assersuutigalugu kommunefogedit pinerluuteqarsimasunillu inissiisarfiit sammingaatsiartarsimavagut. Toqqaannartumik oqaloqatiginninneq suliallu qanimut takullugit paasisaqarnartorujussuuvoq. Tasiilap nunaqarfii eqqarsaaatigalugit nuannaarutigaara ukiorpassuarni siullermeersumik Tasiilap nunaqarfiini tamani kommunefogeditut atorfiit inuttalerneqartussanngormata, tamannalu pissaaq ukioq manna juunimi. Kommunefogedit pitsaanerusumik atugassaqartinnissaannik samminninnerput iluaqutaasimavoq, tamannalu qiimmaallannartorujussuuvoq, Johan Lund Olsen oqarpoq.
Tiniteqilaami paasissutissiilluni ataatsimiititsinermi saniatigut ohan Lund Olsen ippassaq maajip aallaqqaataani Tasiilap katersortarfiani ammasumik ataatsimiititsivoq, ullumilu arfininngornermi nalunaaqutaq 13.00 Kulusummi ataatsimiititsissaaq. Sapaammi Nuummi Atuarfik Ukaliusami, USK, nalunaaqutaq 13.00 ataatsimiititsissaaq.
Johan Lund Olsenip nalunaarutigaa folketingimut qinersinissami qinigassanngortinniarluni, maaniinnerminilu Tasiilami Pinerluuteqarsimasunut Inissiisarfik Tasiilallu Politiivi pulaarsimaai.
Paasissutissiilluni angalaneq, ilaatigut Pituffimmi kiffartuussinsisamik isumaqatigiissutip ulapputigineqarnera pissutigalugu, marlussoriluarni kinguartinneqartarsimavoq. Kalaallit Nunaannit ilaasortat ukiumi qinersiffiusumi marloriarlutik paasissutissiillutik angalanerat Folketingip akilertarpaa, qinersisartunik oqaloqatiginninnissaannik Kalaallit Nunaannilu ineriartornermik namminneq takunninnissaannik periarfissinniarlugit.