Ishavetip eqqissitinneqarnera

'Assigiinnarpaa Saharami nannunniaqqusinnginneq'

Aalisarnermik ingerlatsisut isumaqarput sisamanngormat Qalasersuup eqqaani Ishavetimi aalisakkat eqqissisimatilluinnarallarnissaannik aalajangerneq takussutissaaginnavissoq

Polar Seafoodip siulersuisuini siulittaasoq Henrik Leth

Nunatsinni aalisarnermi pissaaneqarnerpaat ilaat Henrik Leth isumaqarpoq Qalasersuup eqqaani aalisakkat eqqissisimatinneqarnerat, issittumi naalagaaffiit tallimat ippassaq isumaqatigiissutigisaat, ´politikkikkut-tarnikkut´ imaluunniit ´politikkikkut-ileqqulersornermik´ iluuseqarnerusoq.

– Takuinnarlugu taamaasiorneq immaqa kusanartoorpasippoq, aalisarnermulli sumilluunniit pingaaruteqanngilaq, Polar Seafoodimi siulersuisut siulittaasuat Sermitsiaq.AG-mut oqardpoq.

Ukiut arlallit aatsaat qaangiuppata Ishavetip eqqissisimatinneqarnera Polar Seafoodimut nunatsinnilu selskabinut allanut aporfiusinnaalissaaq.

Avannaani pisat iluanaarnartut
– Assigiinnangajappaa nannut nungusarneqarnissaat ernumagalugu neriorsuisoqartoq Saharami nannunik pisaqartoqanngisaannassasoq.

Henrik Lethip nassuerutigaa nunatta imaanut 200 sømilimik killeqarfiata iluani avannarlerpaami kilisaatit anginerit kiilumut akiginnerpaanik pisaqartartut.

Aamma ilisimaneqarpoq nunarsuarmi aalisakkat amerligaluttuinnartut avannarpartertut, inuiaarsuarlu tamanna, suli immap sikuanik qallersimasoq, qularnanngitsumik ullut ilaanni nunarsuarmi aalisarnermik ingerlatsisunit annerpaanit sorsuffiulissaaq.

Naalakkersuisoq nuannaarpoq
Akerlianik aalisarnermut naalakkersuisoq ippassaq nuannaarpoq, naalagaaffiit sineriallit Canada, Norge, Rusland, Danmark USA-lu isumaqatigiissuteqartut saqqummiunneqarmat.

Taassuma nuannaarutigaa diplomatit pinngortitap pisuussutaanik mianersortumik tunngavilimmik iliuuseqarmata.

– Nuannaarutigaara issittumi naalagaaffiit sineriallit tallimat taakkua isumaqatigiissutigimmassuk aalisarneq tamarmi mianersortumik tunngavilimmik ingerlanneqassasoq, aallaaviussaarlu tamaani peqqissumik piujuartitsinermillu tunngavilimmik aalisarneq, Karl-Kristian Kruse sisamanngormat tusagassiorfinnut nalunaarutikkut oqarpoq.

– Uagutsinnut pingaaruteqarpoq isumaqatigiissutip taassuma piviusunngortinneqarnera pissasoq naalagaaffinni sinerialinni tallimani innuttaasut peqataatinnerat tunuliaqutaralugu, aammalu naalagaaffiit allat kajumissaarneqassasut piumasaqaatit taakkua akuereqqullugit.

Powered by Labrador CMS