Imigassanut inatsit
Assiaqusersuinissaq ukiortaamut kinguartinneqartoq
Nalunaarut akissutissarsiffiuvoq apeqqutinilli nutaanik pilersitsilluni
Imigassaq pillugu inatsisimmi sukaterinerit marsip aallaqqaataani atuutilissapput, niuertarfinnili immiaaqqat, viinnit kimittuullu assiaqusernissaannik aalajangersagaq oqaluuserineqaqisoq aatsaat januaarip aallaqqaataani 2019-imi atuutilissaaq.
Tamanna Avannaani Tunumilu niuertarfiit isiginiarneqarnissaannik peqquteqarpoq, taakkumi marsinngortinnagu assiaqusersuinissamut atortussat pisariaqartut pissarsiariuminaatsissavaat.
Sermitsiaq aviisi tallimanngorpat saqqummertussami taama allaaserisaqarpoq.
Peqqissutsimut Naalakkersuisoqarfiup niuertarfinni imigassamik assiaqusersuinissaq pillugu nalunaarut tusarniaassutigaa februaarip aappaa sioqqullugu akineqartussatut, siunnersuullu Naalakkersuisut nittartagaani tusarniaassutit akornanniilluni.
– Naalakkersuisoqarfimmut tulluassagaluarpoq oqaatigineqartuuguni inatsisip ilaa assiaqusiinissamut tunngasoq aappaagumut kinguartinneqassasoq, taannartaami aalassassutaanerpaavoq inatsit Inatsisartuni akuerineqarmat, KNB-mi tuniniaanermut pisortaq Jes Nyborg Sermitsiamut oqarpoq.
Assiaqusersuinissamut peqqutaavoq immiaaqqat, viinnit kimittuullu pisinianut ersarissumiinnginnissaat, ulluinnarni nioqqutinik pisiniarlutik niuertarfiliarpata.
Allaaserisaq, sapaatip akunnerani Sermitsiami, tallimanngorpat saqqummertussami, tamakkerlugu atuarsinnaavat. Aviisi uani pisiassaalereerpoq: