assartuussineq
Assartuinerup naatitsineq akornuseraa
Kujataani nunalerinermik inuussutissarsiuteqarnerup ineriartornissaralua imaatigut assartuinerup kingaappallaarlunilu eqarpallaarnerata akornuserpaa. Royal Arctic Linep assartuinerup pitsaanerulernissaa neriorsuutigisinnaanngilaa. Taamaatttumik Kommune Kujalleq pitsanngorsaaniarluni maanna suliniuteqalerpoq
Naalakkersuisooqatigiit Siumut, Atassut aamma Demokraatit suleqatigiinnissamut isumaqatigiissutaanni ersarissumik allassimavoq, nunalerinermik inuussutissarsiuteqarnerup ineriartortinneqarnissaanut atatillugu assartuinerup inerisarneqarnissaa sulissutigineqassasoq.
Taamaalliornikkut Kalaallit Nunaata naatitanik imminut pilersorsinnaalernissaa ilaatigut anguniarneqarpoq. Kisiannili naatitanik nutaarluinnarnik sinerissamut assartuinermut atugassarititaasut, ukiunilu arlalinni ajornartorsiutaasut, suli maannakkumut aaqqiivigineqanngillat.
Imaatigut naatitanik assartuinerup ajornartorsiutaanera, minnerunngitsumillu nunalerinermik inuussutissarsiuteqarnikkut ineriartortsitsinnginnerup, savaatillit amerliartuinnartut ukiuni kingullerni naatitsinermik ingerlataqartut aningaasanik isertitaqarnerunissaraluannik annertuumik killilersorpaa.
Saaffiginnittarnerit
Tasilummi savaatilik Otto Nielsen, 57-inik ukioqartoq, ukiut kingulliit tallimat ingerlanerini iluatsilluartumik naatitsinermik ingerlataqarpoq. Taassuma Brugsen aamma Pisiffik suleqatigalugit sinerissamut naatitanik nutaanik tuniniaasarpoq.
Royal Arctic Lineli naatitanik assartuinermik akisussaasuusoq, naatitsinermik inuussutissarsiuteqartut pisariartitaat aallaavigalugit ingerlatsinngilaq.
- Naatitat nutaarluinnaat Qaqortumiit Nuum- mut assartorneqarnerat sapaatit akunnerinik marlunnik sivisussuseqarsinnaasarpoq. Assartorneqarneranni piffissaq taamak sivisutigitillugu naatitat ilaatigut nutaanngilereerlutik ammalu tunineqarsinnaajunnaareerlutik pisiniarfinnut annguttarput, Otto Nielsen oqarpoq.
Taassuma savaatillit allat peqatigalugit Savaatillit Peqatigiit Suleqatigiissut, SPS, aqqutigalugu ataasiaratik assartuinerup pitsaanerulersinneqarnissaa anguniarlugu Royal Arctic Linemut saaffiginnissuteqartaraluarput, kinguneqarnerli ajortumik.
Royal Arctic Linelumi assartuinerup imaaliallaannarluni allanngortinneqarsinnaanissaanik imaluunniit pitsaanerulersinneqarnissaanik neriorsuuteqarsinnaanngilaq.
Allaaserineqartoq tamaat Tamanut Kujataanimi atuarneqarsinnaavoq. Kommuni Kujallermi pisartut assigiinngitsut aviisimi aamma atuarneqarsinnaapput. Aviisi akeqanngitsumik ataani aaneqarsinnaavoq: