Assartuinermut akit qaffanneqarnerat KNI-mi malugineqassaaq

Royal Arctic Line A/S-ip assarsuinermi akii 2014-imi Naalakkersuisut 5 procentimik qaffaaneri aammalu 2015-imi nalimmassaasoqarnissaa pillugu KNI A/S-imi atuisartut malugissavaat.

5 procentimik qaffaaneq ukiormanna 4 million koruunit missaannik KNI A/S-imut naleqassasoq nalunaarutigineqarpoq.

- Qaffaassutaasoq nioqqutissanut aalajangersimasunut agguataartariaqarparput, nioqqutissallu pineqartut tassaapput amerlasuunngorlugit tunisartakkagut. Taamaattumik nioqqutissat akiisa qaffaataat tamatigut assigiinnavianngilaq, assartuinermut pisortaq Lars Steen Petersen oqarpoq.

- Assartuussinermut akit allannguuteqarpallaannginnissaat siunertaralugu illuatungeriit oqaloqatigiinnermikkut qanoq iliuuseqarsinnaannginnersut pillugu KNI A/S arlaleriarluni RAL-imut innersuussuteqartarsimagaluarpoq. Tamatumunnga RAL isumaqataalluni nalunaartarsimagaluarpoq, qaammatilli kingulliit aqqaneq marluk saaffiginnissummut malitseqartitsisimanani, Lars Steen Petersen nassuiaavoq.