assartuisarnerit
Assartuinermi akit qaffanneqarneri Atassummit isorineqartoq
RAL-ip assartuinermi akini 2014-imi 5 procentimik qaffaanera 2015-imilu aamma nalimmassaasoqarnissaa pillugu Atassut Naalakkersuisunut apeqquteqarpoq
- Atassummit erseqqissaatigissavarput inuiaqatigiinnut pingaaruteqarluinnarmat nukittuumik, eqaatsumik, isumannaatsumik aammalu ingerlaavartumik nioqqutissanik pilersuinerup assartuinerullu ingerlanneqarnissaa, ullumikkut aamma siunissami.
- Taamaammat isumarput naapertorlugu angallanneq pillugu Naalakkersuinikkut ingerlatsinermi kukkusumik aallaavilimmik ingerlatsisoqarsinnaanissaa akissaqartinngilarput, taamaammallu pingaaruteqarluinnarpoq nalorninartumik inissisimaneq pinngitsoortinniassallugu, taamatummi inissisimasoqarpat aalaakkaasumik isumannaatsumillu ingerlatsisinnaaneq qulakkeerneqarsinnaajunnaassammat.
Atassutip Inatsisartunut ilaasortaatitaat Knud Kristiansen aamma Gerhardt Petersen paragraf 37 atorlugu Naalakkersuisunut apeqquteqarnerminnut tunngavilersuipput.
Royal Arctic Line A/S-ip assarsuinermi akii 2014-imi Naalakkersuisut 5 procentimik qaffaaneri aammalu 2015-imi nalimmassaasoqarnissaa pillugu qisuariaateqarput.
Paragraf 37 naapertorlugu Naalakkersuisunut tallimanik ima apeequteqarput:
- Ukioq manna 5 procent-imik aappaagulu 5 procent-imik assartuinermut akit qaffanneqarnissaasa saniatigut inuiaqatigiinnut allatigut eqquisoqannginnissaa Naalakkersuisut qanoq iliorlutik qulakkeerniassavaat?
(2015-imi 5 procentimik qaffaasoqaqqinnissaa eqqunngilaq, qanoq annertutigisumik nalimmassaasoqassanersoq suli ilisimaneqanngilaq) - Assartuinermut akit qaffanneqarnissaat pinngitsoortinniarlugit RAL-ip ilumini pisariillisaaneq aammalu sipaarniarneq aqqutigeqqaarsimaneraat pillugu akissutisiarput naammaginartumik matussusiinngilaq. Matumuuna RAL-ip pisariillisaanerit sipaarniarnerillu ilumini iliuuserisimasai pillugit erseqqissumik nassuiaammik piumasaqaateqarpugut aammalu minnerunngitsumik siunissaq eqqarsaatigalugu ingerlatseqatigiiffimmut tunngatillugu pilersaarutigineqartut ilanngunneqassasut kissaatigaarput.
- Assartuinermi akinik qaffaanerup kingunerisinnaasai pillugit misissueqqissaarneq qaqugu tamanut takussutissiarineqassava?
- Pissutsit qanoq ittut qulakkeersinnaavaat inuiaqatigiit aammalu inuiaqatigiinni inuussutissarsiornermik ingerlataqartut assartuinermi akit qaffanneqarnerisa saniatigut annertunerusumik eqqorneqassanngippata?
- 2013-mi ukiup affaani siullermi RAL-ip naatsorsuutaasa 3. September 2013-mi tamanut saqqummertumi takussutissaqarpoq pissutissaqartoq aarlerissalluni 2013-mi ukioq naatsorsuusiorfik RAL-imut kingumut pitsaanngitsumik kinguneqassasoq (Akileraarut suli ilanngaatiginagu minus 59,7 mio. kr.). RAL-ip ataatsimeersuarnissaanut RAL-imut piumasaqaatigineqartussat Naalakkersuisut suut saqqummiutissamaarpaat, aammalu piffissap imaalinerani angusaqarnerlussimanermik aallaaveqarluni naatsorsuutit akitsuinikkut eqquereernerup qaavatigut akitsuisariaqalernermik inuiaqatigiinnik eqquisoqassanngitsoq Naalakkersuisut qularnaatsumik neriorsuutigisinnaavaat?