VM-mut anngunniunneq

Assammik arsarnermi nunanut allanut unammisartut unamminerminni siullermi ajorsartut

Kalaallit arnartaat Paraguayimut unamminerminni siuaqqasaraluarput, taamaakkaluartorli isertitanik arfineq marlunnik ajorsarput

Kalaallit Paraguayimut unammineranni Mia Egede Rasmussen arfinileriarluni isertitsivoq. Assi toqqorsivimmit

Assammik arsarnermi Panamerikami pissartanngorniunnermi, aamma VM-mimut anngunniunnerusoq, kalaallit arnartaannit peqataaffigineqarpoq. Unammersuaarneq Cuba-mi ingerlanneqarpoq.

Paraguayimut unamminermi kalaallit arnartaat aallartilluaraluarput, muminnermi 10-9-mik siuaqqallutik.

Immikkoortup aappaani aamma aallartilluaraluarput, isertitanik marlunnik siuaraluarlutik.

Ajoraluartumilli kalaallit ajorsarput, Paraguay 25-18-mik ajugaavoq.

Venezuelamut unammissapput
Unamminermi Mia Egede Rasmussen kalaallini isertitsinersaavoq arfinileraarluni, Nivi Berthelsen aamma Najaaja Lyberth sisamanik isertitsipput kiisalu Anja Heilmann Panu Grønvoldilu marlunnik isertitsillutik.

Kalaallit Venezuelamut ullumi tallimanngornermi unammissapput. Kalaallit nalunaaqutaat naapertorlugu unamminerat nalunaaqutaq 11.00 aallartissaaq.

Kalaallit gruppianni inernerit allat:

  • Brasilia – USA 28-14
  • Puerto Rico – Venezuela 25-25

Gruppe B:

  • Cuba – Argentina 24 – 23
  • Uruguay – Chile 29 – 27
Powered by Labrador CMS