Assammik arsarluni unamminermi pissanganartumi Minik naligiiginnarsitsivoq

Unamminerup naammassinissaa sekundinik arfineq-marlunnik sioqqullugu Minik Dahl Høegh isertitsigami GOG-p semifinalimut anngunniarnerani pointimik pingaarutilerujussuarmik annaappaa. Unamminerup naammassinissaanut sekundit 21-iinnanngortut GOG 22-23-mik kinguarsimasoq sungiusaasuuneq Jakob Larsen timeout-erpoq. Unammisartut peqatigalugit saassussinissaq kingulleq pilersaarusiorneqarpoq. Minik Dahl Høegh periarfissaqaleriaruni isertitseriassaaq. Sekundillumi arfineq-marluinnanngortut periarfissarsivoq, Minik Dahl Høeghilu qummut pisseriarluni unamminerup inerneranut 23-23-mut isertitsivoq. Skjern saassuseqqikkaluarpoq maangaannartumik, GOG-lu slutspil-imi suli ajugaaffigineqarani arfineq-marlunnik pointeqalerpoq.
GOG Arena-mi isiginnaartut 1800-ungajaat TV-kullu isiginnaartorpassuit minutsit 30-t marloriarlugit aliikkusersorneqarluartut. Aatsaat taama pissanganartigisumik, sekundimit siullermit aallartittumik. Isertitsinerit torrallatat. Målmandit annaasseqattaarnerat. Sukkasuumik saassussilluni isertitsinerit. Periarfissat maangaannartinneqartut. Anisitsinerit qulit. Straffit pingasut isertinneqanngitsoortut. Aappalaartumik nittaavigineqarluni anisitaasoq ataaseq, minnerunngitsumillu sungiusaasut marluk, suut tamaasa atorlugit ajugaaniarsarisut.
Imaalluarsinnaavoq isiginnaartut unamminermi ajugaatitsineq ajortut, isiginnaartulli 1800-t tamaviaaqataasut, suaartartut, ersaattaattut piffissanilu sivisuuni nikuillutik tapersersuisartut allaanngilaq GOG-mi unammisartut kivillugit siumut ingerlatikkaat. Nipilersuutillu nutaajunerpaat atorlugit assammik arsarnermi nipilersukkat pitsaanerpaat, soorlu Sweet Caroline nipitoorsuarmik atorlugu, sulifik nalinginnaasuugaluarpat sullivinnik nakkutilliisoqarfiup inerteqqutissaagaluanik, taamaattumik allaanngilaq misigisimanalaartoq GOG Arena-mi nuannernerpaamik tapersersuisut akornanniilluni qanoq innersoq.

Kalaallit takutitsilluaqqipput
Minik Dahl Høegh unamminermi siullersaalluni isertitsivoq taaneqareersutullu aamma kingullersaalluni isertitsilluni, unamminerup inerneranut 23-23-mut. Minik katillugit sisamanik isertitsivoq. Akutaaneq Kreutzmann unamminerup immikkoortuani siullermi minutsini 15-ini unammeqataavoq, piginnaasaqarneralu malunnarsigaluttuinnarpoq. Unammisartorsuanngortussaq sæsonini tullerni malinnaaffigissallugu pissanganassaqisoq. Skjern-ip unammisartuini tupaallannanngitsumik Henrik Mølgaard, Claus Møller Jacobsen piffissallu ilaanni aamma Kasper Søndergaard arsarluarnersaapput.

Taartaasartut pingaaruteqassusiat
Sungiusaasup Jakob Larsenip unamminerup immikkoortuata aappaa tamaat Kenneth Dahl unammitippaa, holdip unammisartorsua islandimiu Snorri Gudjonsson pinnagu. Tamanna aalajangerneq silatusaarneruvoq. Kenneth Dahl arsarluarnersaavoq tallimanillu isertitsigami GOG unamminermi malinnaatippaa. GOG-mut ernumanartoqarpallaanngilaq Snorri Gudjonsson sæsonip tullianit Frankrigimi unammisalissammat. Ernumanarneruvorli målmandi Kevin Møller, sæsonimi ligami målmandinit kikkunnit tamanit annaassillaqqinnerpaasimasoq, tyskit klubbersuannik SG Flensburg-Handewitt-imik isumaqatigiissuteqarsimammat. Unamminerup ingerlarnga eqqarsaatigalugu Jakob Larsenip naligiiginnarneq naammagisimaarluarpaa, unamminerullu kingorna Sermitsiaq.AG-mut imatut oqarpoq:
– Holdi nersugassarujussuuvoq. Unammisartut nalissaqanngillat. Tunniutiinnarumaneq ajorput. Holdimut sukalasoorujussuarmut pointinnappugut semifinalimullu anngunnissarput nammineq aalajangersinnaavarput. Taamaassappalli puljemi unamminerni kingullerni marlunni pointinnannissarput, pisarnitsitullu unamminerit ataasiakkaarlugit pilersaarusiortassavagut.
Semifinalimi inissat marluk GOG-p, Team Tvis Holstebro-p Skjern-illu pinnanniuppaat, semifinalimilu unamminilu unammisassat tassaapput puljep aappaani siullinngortoq tullialu.
GOG sisamanngornermi illernartumi unammeqqissaaq, tassani Team Tvis Holstebro taassuma unammisarfiani unammissallugu. TV2-mi GOG-p unamminera Supernatchen-imi unamminerit aappaattut aallakaatinneqassaaq. Unammineq aallartissaaq nunatta nalunaaqutaa malillugu 13.10.