Assammik arsarluni pissartanngorniunnermi divisionit marluussapput

Assammik arsarluni nunatsinni pissartanngorniunnermi klubbit kakkannerit imminnut unammisassapput, holdillu sanngiinnerit immikkut divisionimi unammisassallutik. Kalaallit Nunaanni Assammik Arsartartut Kattuffiat qaammammi matumani siusinnerusukkut ataatsimeersuarami taamatut aalajangiivoq.

Suli aalajangiunneqanngilaq

Kattuffiulli siulittaaua qinigaaqqittoq Nuka Ole Berthelsen Sermitsiaq.AG-mut oqarpoq unammiuaarneq qanoq avinneqassanersoq suli aalajangerneqanngitsoq.

– Unammiuaarnermut Ataatsimiititaliaq saqqummiussissaaq 1.- aamma 2. divisionit qanoq isikkoqassanersut. Tamatuma kingorna isumaliutersuutit siulersuisut nalilissavaat aalajangiussillutillu, assammik arsartartut kattuffianni siulittaasoq oqarpoq, ilanngullugulu oqaatigalugu unammiuaarnermut ataatsimiititaliap siunnersuunni saqqummiutissagaa assammik arsartarnerup aallartinnginnerani.

Meeqqanik unammisitsisarnerit børnecup unitsillugit

Kattuffiup meeqqanik unammisitsisarnerit børnecup unitsinniarpai. Taarsiullugu unammiuaarnerit ´nunatsinni pissartanngorniunnertut´ taaguuteqalissapput, unammiuaarnerit nunap immikkoortuini ingerlanneqartaraluartut (Kujataani, Qeqqani Avannaanilu).

– Taamaasilluni pissartanngorniunnernik aaqqissuussisut tapiiffigineqarsinnaapput, Cup-imik unammiuaartitsinerit aningaasanik tapiiffigineqarneq ajormata, Nuka Ole Berthelsen erseqqissaavoq.

Ataatsimeersuarnermi Nuka Ole Berthelsen oqaatigineqareersutut siulittaasutut qinigaaqqippoq.

Siulersuisut imatut isikkoqarput:
Siulittaasoq: Nuka Ole Berthelsen
Siulittaasup tullia: Axel Lund Olsen
Allatsi: Kristian Heilmann
Siulersuisunut ilaasortaq: Boas Møller
Siulersuisunut ilaasortaq: Lene Ravn Davidsen
Siulersuisunut ilaasortaq: Jørgen Isak ”Erni” Olsen
Siulersuisunut ilaasortaq: Edvard Ostermann Egede
Sinniisussaq: Nina Chemnitz
Sinniisussaq: Sidse Lyberth Berthelsen
Sinniisussaq: Linda Madsen