Assammik arsarluni DM-ip kingorna kalaallit apersorneqarnerat

Sæsonimi GOG-mut ingerlalluarfiusimaqisumi GOG bronzenappoq taamalu europami unammiuaarnissamut anngulluni.

GOG sæsonip ingerlanerani unammisarfini GOG Arena, isiginnaartunik Danmarkimi pitsaanerpaanik ulikkaavillugu unammisarsimavoq. Anguniagaasimavoq slutspil-imut anngunnissaq.

Tamannalu iluatsippoq.

Klubbi slutspil gruppimi normu 4-aalluni kingullersaallunilu aallartikkaluarlugu GOG ajugaaffigineqarani unamminerit pissanganartaqisut arfinillit kingorna semifinalimut annguppoq. Tassani grundspillimi siuttoq Team Tvis sukalavallaaqaaq. Team Tvis Holstebrop semifinalip aappaani ajugaasoq Bjerringbro-Silkeborg finalimi unammivaa. Semifinalini ajorsartut, GOG aamma KIF Kolding København, bronzenanniupput, naluneqanngitsutullu GOG tassani ajugaavoq.

Kalaallit GOG-mi unammisartuusimasut

Akutaaneq Kreutzmann aamma Minik Dahl Høegh sæsonip tullianit GOG-mi unammisartuujunnaassapput. Akutaaneq Kreutzmann Ribe Esbjerg HH-mi unammisartunngussaaq Minik Dahl Høeghilu Århus Håndboldimi unammisartunngussalluni. GOG-mi unammisartut arlallit aallassapput, taamaattumik sungiusaasoq Jakob Larsen unammisartussaminik nutaanik ujarlerluni sæsonip aallartinnerani ulapissaaq.

Kalaallit nunanut allanut unammisartuusimasut Peter Sikimsen, Jakob Larsen aamma Rasmus Larsen siusinnerusukkut GOG-mi unammisartuusimapput.

Taamaasilluni Minik Dahl Høegh aamma Akutaaneq Kreutzmann piffissap ingerlanerani GOG-mi unammisartuusimasut allattorsimaffiannut, GOG Arrenap isaariaani nivingasumut, ilanngunneqassapput.

Akutaaneq Kreutzmann

Sermitsiaq.AG-mit apersorneqarluni Akutaaneq Kreutzmannip isertuutinngilaa medaljenattaani nuannaarutigeqalugu.

– Ilumoorlunga oqassaguma tamanna naatsorsuutigisimanngilara. Sinnattoriinnarlugulu neriuutiginnarsimavara. Taavalu pileriallariga medaljenalluta. Sæsonip takisuup naggataarneqarnera nuannerluinnartoq.

Pingasunngorpat pokalinnanniulluni unamminermi naggataamik GOG-mi unammereeruni Akutaaneq Kreutzmann nunanut allanut unammisartut ilagalugit Argentinamukassaaq tassani Amerikap Nunavissuani Pissartanngorniunnermi peqataajartorlutik. Tamatuma kingorna pisariaqartitaminik Kalaallit Nunaanni feriassaaq, sæsonip nutaap aallartinnginnerani.

Minik Dahl Høegh

Minik Dahl Høegh ippassaq Fyens Stiftstidendemut imatut oqarpoq:

– Taamatut naggataarilluni nuannersorujussuuvoq. Semifinalimi ajorsarnermut taartissatuaasimavoq bronzenannissaq.

– Tamannalu peqatigalugu KIF Kolding København ajugaaffigigatsigu immikkut nalissaqannginnerulerpoq.

Minik Dahl Høegh GOG-mi naggataamik unammissaaq arfininngorpat, aamma pokalinnanniulluni unamminermi. Tamatuma kingorna aamma taanna Argentinamukassaaq. Juunip 8-anni Buenos Airesimut aallassaaq, tassani Amerikap Nunavissuani Pissartanngorniunnermut peqataajartorluni.

Jakob Larsen

– Bronzenanneq pingaarutilerujussuuvoq, Jakob Larsen Sermitsiaq.AG-mut oqarpoq.

– Tamarmik isumaqatigaat sæsonimi ingerlalluarsimaqisugut. Qaangerniagassaq tamanna imaannaanngitsuussaaq. Europami unammiuaarnermi peqataasussanngorpugut. GOG Arenami nunanit tamalaaneersut unammisaleqqissapput. Qularnanngitsumik EHF Cupimut anngunniuteqataassaagut. Immaqalu Champions Leaguemut wildcardimik tunineqarsinnaavugut.

– Maanna pokalinnanniunnerup 6. rundiani pingasunngorpat juunip aallaqqaataani nalunaaqutaq 19.00 unammissaagut sæsonimilu matumani suliaq naammassissallutigu. Københavnip eqqaani Hellerupiliassaagut, tassani 1. divisionimi unammisartoq HIK unammissllutigu.