assammik arsaanneq

Assammik arsaattartunut sungiusaasoq: Alloriarneq tulleq tigutigu

Kalaallit Nunaat assammik arsarnerup silarsuaani ineriartornerussaguni, unammisarnerit amerlanerusariaqarput, Johannes Groth isumaqarpoq.

Kalaallit Nunaat assammik arsarnerup silarsuaani ineriartornerussaguni, unammisarnerit amerlanerusariaqarput, Johannes Groth isumaqarpoq.

- Assammik arsaannermi nunani allani ineriartorneq annertuvoq, Kalaallit Nunaannilu unamminerit amerlanerulersinniarlugit iliuuseqartoqartariaqarpoq.

Johannes Groth Sermitsiaq.AG-mut taama oqarpoq, taanna Nunatsinni tulleriiginnarnik arfineq-marloriarlutik pissartaasunut, GSS-it angutitaannut sungiusaasuuvoq, nunanut allanut unammisartullu arnartaannut sungiusaasuulluni.

Timersornermi annertunerusumik ineriartortoqassappat, unamminerit amerlanerusariaqarput.

- Ullumikkut ukiumoortumi sapaatip-akunnerinnaani unammisoqartarpoq, tamannalu pissartanngorniunnermi pisarpoq. Kisianni nunat allat unammisartakkagut sapaatip-akunneri tamaasa unammisarput, ineriartornermullu malinnaassagutta klubbit akornanni unammisarnerit amerlanerusariaqarput, Johannes Groth oqarpoq, nammineq inuttut oqaaseqarluni, Kalaallit Nunaanni Assammik Arsartartut Kattuffiat sinnerlugu taamatut oqaaseqarnani naqissusiivoq.

Ineriartupiloortoqassaaq
Nunatsinnilu pissartanngorniunnernit alloriartoqarnissaanik Johannes Groth taamaattumik siunnersuuteqarpoq.

- Unammiuaarnerit qanoq ingerlanneqarsinnaanerisa oqaluuserineqarnissaat pingaaruteqarpoq, immaqa qaammat allortarlugu unammisoqarsinnaavoq, taamaalillunilu ineriartupiloortoqarluni.

- Suliffeqarfiit akornanni suleqatigiittoqarneratigut aamma angalanermik akisussaasut peqatigalugit anguneqarsinnaavoq. Aningaasaqarneq aporfiit annersarigaat nalunngilara, amerlasuullu aallartinneqarnissaalu ajornarluinnassasoq isumaqassasut nalunngilara. Kisianni iluamik pilersaarusioraanni iluatsinneqarsinnaasoq qularinngilara, Johannes Groth nassuiaavoq.

Timersuutit aamma allat
Allanik timersuutillit aamma isumassarsiamut ilanngunnissaat qularinngilaa.

- Kalaallit Nunaanni timersornermi allariarneq annertuujussaaq. Una assammik arsaannermut tunnganngilaq, kisianni timersuutit allat ataatsimut eqqarsaatigineqarput. Maanna ingerlariaqqittariaqarpugut, siullermillu oqaloqatigiissutigineqartariaqarpoq, Johannes Groth oqarpoq.

Inersimasut assammik arsaallutik pissartanngorniunnerat marlunngorpat aallartissaaq, uanilu sapaatip-akunnerani Nuummi ingerlanneqassapput.

Powered by Labrador CMS