Assammik arsaattartoq tunuartoq

Nivi H. Efraimsen, 185 cm angissusilik, 38-nik ukioqarluni taamaatippoq. Taanna Amerikap nunavittaani pissartanngorniuttarnerni arlalinni unammeqataasimavoq nunarsuarlu tamakkerlugu pissartanngorniunnermi Italiami 2001-mi unammeqataanikuulluni. Taanna unammisartuunermini Nunatsinni Danmarkimilu peqatigiiffiit arlallit unammisartuuffigisimavai. Assammillu arsaattartuunini Sisimiuni peqatigiiffinni SAK-mi S-68-milu aallartinnikuuvaa.

Piffissami sivisulaami taanna assammik arsaannermiik peqataassaarsimangaluarluni unammisaleqissimavoq, kingornalu nunanut allanut unammisartunut toqqangaaqqilluni. Taanna ukioq manna Norca-mi pissartanngorniunnermi Puerto Rico-mi ingerlanneqartumi peqataavoq.

- Ukiunut aggersunut nunanut allanut unammisartunut pilersaarutigut eqqarsaatigalugit Nivi ukiunik 10-15 inuusunnerunnginnera aliasuutigaara. Angissutsini iluaqutigalugu tapertaalluarpoq, suullu unammisarnerni piumasaqaataanersut paasisimalluarlugit, Johannes Groth tusagassiuutinut nalunaarummi allappoq.

Nivi H. Efraimsen oqarpoq:

- Siullermik angajoqqaannut qujaruppunga, isumassuilluarnerannut, ajortunut tamanut illersorlunga. Timersornerullu tungaatigut kaammattortuarmannga. Minnerunngitsumik Sisimiuni S-68-imi taamatuttaarlu SAK-mi sungiusaasorisimasakka qujassutissaqarfigeqaakka. Taakkuuppummi assammik assarnermik soqutiginninninnut pisooqataanerpaasut. Minnerunngitsumillu sinerissami aamma sungiusaasorisarsimasakka ilissiuvusi uannik ineriartortitseqataanikut, qujanarujussuaq. Arsaqatiginikuusakka tamassi aamma ilissi qujanarujussuaq nuanningaartorsuarmik kinnertarnissinnut. (1993-2017) oqaaseq “Qujanaq” amigarpoq. Assammik arsartartuunerup nunarsuara millisinnikuuaa, Tassa Nunat arlallit assammik arsartartuunerma tikitsittarmagit.

Nunanut allanut unammisartuni peqataasussat 30-t, ukiup siualianut sanilliunnerini nutaartaqarnerusussat, ullut 14-it qaangiutsinnagit Johannes Grothip saqqummiutissavai.