assakaasut ukiorsiutit
Assakaasut ukiorsiutit pillugit malittarisassat allanngortilersaarpaat
Nunatsinni tamarmi biilit assakaasuisa ukiorsiutit kingusinnerpaamik maajip aallaqqaataani taarsereersimanissaannik piumasaqaat siunissami allanngortinneqassannguatsiarpoq
Maanna ilimanarsivoq siunissami avannaani biilit assakaasui ukiorsiutit sivisunerusumik atorneqarsinnaalissasut illoqarfinnut kujasinnerusuniittunut sanilliullugit. Nunatta isorartunerujussuanik pissuteqartumik pissutsit assigiinngissinnaanerisa eqqumaffiginissaat tunaartaralugu allannguinissaq Naalakkersuisut misissorpaat.
Ukiormanna illoqarfinni arlalinni politiit isiginngitsuusaaginnarallarpaat biilerpaaluit maajip aallaqqaataata kingorna ukiorsiutinik suli assakaasoqarnerat. Inatsit atuuttoq malillugu assakaasut ukiorsiutit maajip aallaqqaataani taarsereersimasussaagaluarput. Upernarniaasaarneranili illoqarfinni arlalinni maajip qaammataani aqquserngit quatserujussuartarput. Taamaammat arlallit assakaasutik ukiorsiutit sivisunerusumik atatippaat.
Politimesterip pisinnaatitaaffii
Palle Christiansen Demokraatineersoq paragraf 37 naapertorlugu apeqquteqarpoq malittarisassat allanngortinniarlugit suliniarneq sumut killinnersoq paasiniarlugu. Suliarlu ingerlangaatsialereersimavoq.
Kommunet aqqusinernut akisussaammata malittarisassat allanngortinnissaanni suliami aamma akuutinneqassapput.
- Suliami alloriarneq tulleq tassaavoq Danmarkimi Trafikstyrelsi inatsisissatut siunnersuummik suliaqassasoq, taakkulu Nunatsinni politimesterimut Nunatsinni sumiiffinni assigiinngitsuni piffissami aalajangersimasumi quaannaveeqqutilinnik assakaasoqarluni angalasinnaaneq pillugu aaqqiissuteqarsinaanermut pisussaaffimmik tunniussillutik, Attaveqarnermut Naalakkersuisut Steen Lynge Atassummeersoq Palle Christiansenimut akissummini allappoq.