nalunaarusiaq siulleq

Assakaasup niuluata napinera pissutaalluni Dash 8 ajutoorpoq

Timmisartup assakaasuata niuluata napinera pissutaalluni Ilulissani januaarip 29-ani ajutoorpoq. Timmisartoq sakkortuallaamik minnerani niulua napisussatut sanaavoq

Timmisartoq Dash 8 Ilulissani januaarip 29-ani minnermini ajutoorpoq

Ilulissani anorlerpallaarnera pissutigalugu kiisalu timmisartup Dash 8-p sananeqarnera pissutaalluni timmisartoq januaarip 29-ani mittarfimmut mereerluni sisoorpoq. Timmisartuni ilaasuni annertunerusumik ajoqqusertoqanngilaq.

Timmisartunik ajutoorsimasoqatsillugu paasiniaasartut nalunaarusiaanni takuneqarsinnaavoq timmisartup assakaasuata saamiatungaata niulua napineranut timmisartup ajutoorneranut pissutaasoq. Timmisartoq sakkortuallaamik minnermini assakaasup niulua aserortussatut sanaavoq.

Timmisartoq ajornerusumik ajoqqusinnginnissaa anguniarlugu assakaasut niului sakkortuallaamik minnermi aserortussatut sanaapput. Taamatut sanaasimanngitsuuguni assakaasut niului timmisartup orsiisarfianut puttussimassagaluarput.

- Timmisartoq annertunerusumik ajoqqusinnginnissaa pillugu assakaasut niului sakkortuallaamik minnginnermi aserortussatut sanaapput. Taamatut sanaasimanngitsuuppata timmisartup sului timmisartullu tankiani ajornerujussuarmik pisoqarsimasinnaagaluarpoq, tuluit ajutoortoqarsimatillugu paasiniaasartui nalunaarput, tuluit nunaannit Plymouthimi 1999-imi assingusumik ajutoortoqareersoq.

Anorlernerani minneq
Ajutoortoqarsimatillugu misissuisartut misissuinerminni paasinarsivoq Air Greenlandip timmisartua timmisartup milernerani qanoq sakkortutigisumik anorlernissaanik killigititaa tikingajallugu ullormi tassani anorlersimasoq.

Timmisartut Dash 8-tat killigisitaqarput 36 knobimik sanimut anorlertumi 10 knobimillu oqumigaartumik anorlertumi minnissamut.

Ullormi ajutoorfiusumi Ilulissani sanimut 26 knobimik anorlerpoq, sakkortunerpaagami 39 knobimik anoreqarluni.

Nalunaarusiarineqartoq pillugu Air Greenlandip suli pisoq oqaaseqarfigisinnaanngilaa.

Matut ammarneqarsinnaanngitsut
Timmisartumi aquttut timmisartup minnerani 100 meterit siulliit timmisartoq pisoq aqulluaraluarpaat, naggataagulli aqussinnaajunnaarlugu.

Timmisartoq mereernermi kingorna 400 meterit kingorna timmisartoq mittarfimmit anilluni innaarsummut aporpoq timmisartoq aserorlugu.

Timmisartumi aquttut timmisartup siuani anisarfikkut anisinnaajunnaaput innaarsummut aporeernermi kingorna, ammaniaqqakkullu timmisartumi inuttaasorlu oqaloqatigiittariaqarlutik. Timmisartumi ilaasut aniasinneqarput, tamarmillu annerusumik ajoqquteqarnatik anipput.

Ajutoornerit assingusut amerlasuut
Nunarsuarmi Dash 8-tat allat Ilulissani ajutoornermik assingusumik ajutoortoqareerpoq arlaleriarluni.

Timmisartup sananeqaataa pissutaalluni Iceland Airip timmisartua Nuummut minnermini 2011-mi ajutoorpoq.

Norgemi illoqarfimmi Widerøemi Kalaallit Nunaannut assingusumi 1999-imit maannakkumut sisamariarluni assingusunik ajutoortoqartareerpoq.

Ajutoornermi misissuinermut inernivia suli nalunaarusiarineqanngilaq.

Powered by Labrador CMS