Tunu

Asii Tasiilami innuttaasunik ataatsimiititsivoq

Kommuneqarfik Sermersuumi borgmesteri sapaatip-akunnerani matumani Tasiilamiippoq, tassani meeqqat inuusuttullu ukkatarineqarput

Innuttaasunik ataatsimiititsineq peqataaffigineqarluarpoq

Aallaqqaataaniilli paasinarsivoq, innuttaasunut ataatsimiititsineq nalinginnaasuunngitsoq.

Ataatsimiititsisut saavanni issiaviit sanileriiaagaanngillat. Taarsiullugu inimi ataatsimiiffiusumi iloqqasunngorlugit inissinneqarsimapput. Tamatumunnga pissutaavoq borgmesterip oqalugiarnissani kissaatiginngimmagu, akerlianilli, innuttaasut qanoq oqarusunnerat tusarusukkamiuk, Kommuneqarfik Sermersooq ilisimatitsivoq.

Meeqqat inuunerissut
- Tasiilami pissutsinik aaqqiiniarluta uummatitsinnit iluunngarluta iliuuseqartaqaagut aningaasartuuteqarfigingaatsiartakkatsinnik. Naak suliat uungarpareeraluartut, angusassarput suli angunngikkipput ersarippoq. Taamaattumik Tasiilami meeqqat inuunerissut qanoq ililluta sinaakkusiussanerlugit innuttaasut siunnersuuteqarnissaat kissaatigaarput, Asii Chemnitz Narup tusagassiuutinut nalunaarummi oqarpoq.

Innuttaasut 110-t missaanniittut ataatsimiinnermi peqataapput, oqaaseqarumasorpassuaqarporlu.

Qiimmaallannartoq
- Ataatsimiinneq qiimmaallannartupilussuuvoq. Tasiilami allannguinissamut piumassuseqartoqarluarpoq. Ataatsimeeqataasut isumaqatigiissutigaat, ajornartorsiutit aaqqinneqarsinnaasut, illoqarfiit tamarmik akisussaaffimmik tigusippata, oqaaqqissaarutigalugulu, isummat aninneqartut eqqunngitsuusut, Asii Chemnitz Narup oqarpoq.

Ataatsimeeqataasut oqaatigaat Tasiilami suliassakippallaarneq ajornartorsiutaasoq. Illoqarfimmi suliffissanik ilinniarfeqarfissanillu amerlanerusunik peqalernissaa, sunngiffimmilu periarfissaqarnerulernissaa kissaatigaat.

Ataatsimeeqataasut arlaqartut uparuarpaat, pingaartumik suliffissaaleqineq inuttut ajornartorsiuteqalersitsisartoq, soorlu imerajuttuunermik, aningaasanoorajuttuunermik meeqqanillu sumiginnaanermik kinguneqartitsisartumik.

Atuaruk: Tasiilami meeqqat pillugit isumaginninnermut suliat 500 sinneqartut

Suliffissaqarnerusariaqartoq
Isumaqataalluinnarpunga. Tasiilami amerlanerusunik suliffissaqalertariaqarpoq, ikinnerpaamillu ilinniaqqiffissaq ataaseq tamaaniittariaqarpoq. Kommunip tungaaniit suliffeqarfiit illoqarfimmi pilersitserusuttut sapinngisarput tamaat tikillugu ikiorusuppavut, borgmesteri oqarpoq.

Ataatsimeeqataasut ilarpassuisa aamma Tasiilami sunngiffimmi periarfissaqarpiannginnera uparuartorpaat. Ilaatigut ivigaaraasanik qallikkamik arsaattarfeqarnissaa, inuusuttunut kulturikkut illoqarnissaa, illoqarfimmi radioqarnissaa timersortarfiullu ammasarfiisa sivitsorneqarnissaat kissaatigaat.

Siunnersuutit ilanngunneqassasut
Ukioq manna Tasiilaq ivigaaraasanik qallikkamik arsaattarfittaartussaagaluarpoq, kisialli suliarinissaa pisinnaasimanngilaq, maannakkorpiaq meeqqerivittaassap tungaanut arsaattarfikkoortumik sulinermi aqqusineqarmat.

Siunnersuutit sinneri kommunip missingersuutissaasa qaammatip tulliani aallartittussamut isumaqatiginninniutigineqarnissaannut borgmesterip ilanngutissavai.

Kissaatit naapertuuttut
- Tasiilami sunngiffimmi periarfissanik amerlanerusunik peqarnissaa qularutissaanngilaq, kissaatigineqartutullu tusaasinnaasakka naapertuupput, taamaattumik amerlanerit piffissap sivikitsup iluani naammassineqarsinnaanissaat qularutiginngilara, Asii Chemnitz Narup oqarpoq.

Borgmesterip aamma Tasiilamiinnermini suleqatigiikkuutaat assigiinngitsut illoqarfimmi ajornartorsiutit pillugit qanimut suliarinnittut arlaqartut ataatsimeeqatigai. Taakku ilagaat inuussutissarsiuteqartut, najukkami ataatsimiititaliaq kommunimilu isumaginnittoqarfimmi sulisut.

Aamma sapaatip akunnerata siuliani borgmesterip nunaqarfiit Sermiligaaq aamma Isertoq tikeraarpai.

Powered by Labrador CMS