Kommunimut qinersineq 2017
Asii Siumumit saassunneqaqqittoq
Borgmester Asii Chemnitz Narup aamma inissianut pilersaarut annertooq pillugu Siumut isornartorsiorluni suli naammassinngilaq. Sapaatip akunnerani kingullermi Siumumi kommunalbestyrelsimut ilaasortat piumasaqarput, nakkutilliisoqarfiup Siorarsiorfimmut suliniut pillugu ingerlatsinermut misissuisoqarnissaanik piumasaqarput, maanna suliniummi siunnersorti Per Bendix sammineqalerpoq.
Partiip kommunimut qinersinermi sassartitaata, Nicolai J. Nissenip, siunnersuisarfik inissianut pilersaarummut suliarinnittup tutsuiginassusaa qularnarsarniarsarilerpaa. Siumumit qinigassanngortittup ataasinngornermi ualikkut tusagassiuutinut nalunaarummi nassiussaani tamanna atuarneqarsinnaavoq.
Aamma atuaruk: Unnerluut: Nuummi borgmesterip kikkut tamaasa uukapaatikkai
- Bendix Consult suliarinnittussarsioqqaarani suliassamik kivitsisinnaasutuaammata suliaqartinneqarsimasut sapaatip-akunnerata siuliani tusagassiuutitigut saqqummerpoq. Professorip pisortat namminersortullu suleqatigiinneranni ilisimasallip, Ole Helby Petersenip, tamanna isumaqatiginngilaa. Toqqagassarpassuusut taanna isumaqarpoq. Suliffeqarfik aamma kommunip suliassamik kivitsisinnaasutuatut isumaqarfigisaa viinninik niuerniarfittut ingerlatseqatigiiffittut pilersinneqarsimanera tupigusuutigineruarput, taannalu aamma Danmarkimi aningaasaliinissamut suliniummut annertuumut ernumanartumik suliaqarnikuusimavoq, Asii Chemnitz Narupip Sermitsiaq.AG-mi Siumut isornartorsiuinera pitsaannginnerarnerata kinguninngua, Nicolai J. Nissen tusagassiuutinut nalunaarummi allappoq.
Aamma atuaruk: Asii akissuteqarpoq: Isornartorsiorneq pitsaasuunngitsoq
Angut viinninik niuerniartarfiutilik suliniummut siuttutut siunnersortiutinneqarsinnaanera, Nicolai J. Nissen tupigusuutigaa.
Ernumanarluinnartoq
- Aningaasaliisarnermut ilisimasalik suliarinnittussarsioqqaarani sulilersinneqartoq arlalinnik ernumassutissartaqarpoq. Bendix Consult aamma Bendix Winemik ateqarpoq, Per Bendixillu ingerlatseqatigiiffik viinninik niuernissamik siunertaqartumik pilersippaa. Per Bendixip viinninik niuerniarfik 2007-imi tunivaa, kisianni inuussutissarsiornermik ingerlatsivinnillu aqutsisoqarfik naapertorlugu Bendix Consult Aps viinninik niuernermik siunertaqarpoq, inuussutissarsiortoq siullermeerluni Siumumit qinigassanngortittoq tusagassiuutinut nalunaarummi allappoq, tamatumalu saniatigut Køgep kommuniani suliniummut Per Bendixip iluatsinngitsoorsimasaanik unnersuussilluni.
Aamma atuaruk: Siunnersortit suliaat millionilik
IA-p aamma Siumup akornanni nipi qinersinissamut sapaatip-akunnera ataasiinnanngulernerani sakkortutsippoq. Kommuneqarfik Sermersuumi borgmesterinngorniunneq Siumumut pingaaruteqarluinnartuusoq tamatuma ersarissisippaa.
Isumaannakkut pilersaarutit
Partiip siulittaasuata inissianut suliniut akerlililiinerani aamma ''isumannaakkut pilersaarutaaneraanerani'', partii sangoriarujussuarpoq. Kommunalbestyrelsimut ilaasortat Asii Chemnitz Narupimik aamma Sermersuumi ilaasortat sinnerinik isumaqatiginnikkaluartut mumillutik maanna suliniut ataavartumik paasisaqarfigisimasartik akerlilerpaat.
Aamma atuaruk: Nunatta oqaluttuarisaanerani inissianut pilersaarut annerpaaq
Illoqarfiup ineriartortinneqarnissaanut suliniummut akerliusoqanngitsoq Nicolai J. Nissen tusagassiuutinut nalunaarummi naqissusiivoq, ''Siorarsiorfimmik suliniut Siumumit qangali suliniutaammat''.
- Siumut kisianni aningaasaliinissamut suliniummillu aqutsinermut tunngasumik isornartorsiortumik apeqqusiinikuuvoq, tamanna naqissuserneqarpoq.