Asii Partii Naleqqamut sakkortuumik isornartorsiuisoq

Kommuneqarfik Sermersuumi borgmesteri, Asii Chemnitz Narup (IA), Jyllands-Postenimi aviisimi allaatigisamini Partii Naleqqamut sakkortuumik isornartorsiuivoq.

Aviisimi aallaatigisami isummernerminut ilisimaneqareersumut tunngavilersuivoq, tassa Nuummi mittarfik 2.200 meterinik takissusilik illoqarfimmi siuariartornermik aamma ineriartornermik pilersitsissasoq.

Kisianni tamanna ulorianartorsiortinneqartoq taanna isumaqarpoq.

- Tassami apriilimili Inatsisartunut qinersisoqarnerata kingorna partiit ilaat Naalakkersuisunut ilaasortaatitaqartoq, innuttaasunut iluaqutaasumik illoqarfiit pingaarnersaattut kommunitullu Nuummi pitsaasumik ingerlaneq, innuttaasunik Nunatsinnit tamanit ornigarneqartoq attatiinnarlugu ineriartortitsinnaanerput maanna qularuteqalersitsivoq.

- Aningaasaliisartunut ajoqutaasoq

Aviisimilu allaatigisap naggataata ilaani Asii Chemnitz Narup ersarinnerusumik oqariartuuteqarpoq.

- Taamaattumik Naalakkersuisut maanna - Partii Naleraq siuttoralugu - siunissami nunatsinni angallannerup aaqqissuussaaneratulli illoqarfiillu pingaarnersaanni Atlantikoq ikaarlugu mittarfissatut pingaaruteqartigisumut qulartitsilernera – siunissamut unerisimanngilersitsivoq nalornilersitsillunilu, taanna aningaasaqarnermut naalakkersuisumut Pele Brobergimut toqqaannartumik unnersuussilluni oqarpoq.

- Inuussutissarsiortutsinnut ipisaatitut isigineqarsinnaavoq. Nuummuunnaanngitsoq Kalaallit Nunaannullumi anguniaqartumik pitsaasumillu ineriartortitsiniarnermut tatiginninnermut toqusaataavoq. Mittarfiinnaanngitsumut – suliniuterpassuarnulli pisarialinnut pissanganaatilinnullu aamma.

- Nunamik pingaartitsiniartorujussuaq

Borgmesteri ataatsimut isigalugu politikkikkut unammillertiminut pitsaasumik oqaasissaqanngilaq.

- Partii Naleraq Nunatsinni partiiuvoq nunamik pingaartitsiniartorujussuunera tassani imminut assortuuttuuvoq, illoqarfiit pingaarnersaata pisarialimmik mittarfittaarnissaanut tunngatillugu nangaanerminni nammineq pingaarnertut anguniagartik kinguarsarpaat: tassa Kalaallit Nunaat namminersortoq. Kalaallit Nunaat nukittuujulluni namminiilivinnissaanik anguniagaq piviusunngornissaminut periarfissaqassappat, taava Nunatsinni innuttaasut amerlinissaannik pisariaqartitsioqarpoq.

- Inuusuttortagut ilinniarluarsimasullu Nunatsinni pitsaasumik siunissaqarnissamut tatiginninnissaat pisariaqarpoq. Aningaasaqarnermik pitsaanerusumik, inissianik pitsaasunik tamanna pisariaqartitsivoq, meeqqeriviit pitsaasut, suliffeqarfiillu pissanganartut. Attaveqaatinik Nuup angissusaanut aamma ineriartorneranut tulluartunik aamma pisariaqartitsivoq, minnerunngitsumillu alliartornissamut periarfissanik atorluaanermik.