meeqqanut akilersuut

Asii: Kommunit meeqqanut akilersuutinik akiliisarnerat ajunngilaq

Meeqqanut akilersuutinut peqqussutip atorunnaarsinneqarneranit, meeqqat pilersorneqarnissaminnut pisinnaatitaaffeqarnerat pingaarneruvoq, illoqarfiit pingaarnersaata kommuniani borgmesteri isumaqarpoq.

Asii Chemnitz Narup
Borgmesteren i Kommuneqarfik Sermersooq, Asii Chemnitz Narup (IA), mener, at børnenes ret til at blive forsørget er vigtigere.

Kommuneqarfik Sermersuumi borgmesterip, Asii Chemnitz Narupip (IA), borgmestereqatini Malik Berthelsen (S) aamma Kiista P. Isaksen (S), meeqqanut akilersuutinik kommunit akiliisarnerannut peqqussutip atorunnaarsinneqarnissaanut isumaqatiginngilai.

Atuaruk: Qeqqata Kommunia: Meeqqanut akilersuutinut peqqussut atorunnaarsinneqarli

Kommunit akiliissapput
Kommunit meeqqanut akilersuutinik akiligaallartarnerat inissaminiittoq, illoqarfiit pingaarnersaata kommnuniani borgmesteri isumaqarpoq.

- Angajoqqaat illuatungeriillutik meeqqaminnut pilersuisussaatitaanerat pitsaasutut oqaatigerusuppara. Pilersuisussaatitaasup pisussaaffigini akiliinani naammassinngippagu, taava pisortat akiliigallartariaqartut isumaqarpunga, tassuunakkut meeqqap pilersorneqarnissaminut pisinnaatitaaffia qulakkiissagatsigu, Kommuneqarfik Sermersuumi borgmesteri, Asii Chemnitz Narup (IA)oqarpoq.

Aamma atuaruk: Kiista: Meeqqanut akilersuutit Namminersorlutik Oqartussanut nuunneqarlik

Akiitsut 143 millionit
Kommuneqarfik Sermersooq meeqqanut akilersuutinut aningaasarpassuarnik akiliisartoq, borgmesteri oqaluttuarpoq, taakkununngarpiarlu akiitsut ullumikkut 143 millionit koruuniunerarpai.

- Pisortat ataatsimut isigalugu soorunami innuttaasut akiitsuinik akiliisitsiniartarnermut pitsaanerusariaqarput. Kisianni uani meeqqat pisinnaatitaaffiisa qulakkeerneqarnissaat pingaartittorujussuuara, meeqqallu isaannit tamanna naliliiffigeqataaffigalugu, Asii Chemnitz Narup oqarpoq.

Isumaginninnermut naalakkersuisoq, Sara Olsvig (IA), peqqussutsip taassuma atorunnaarsinneqarnera ajornartorsiummut aaqqiissutaanngitsoq, ippassaq Sermitsiaq.AG-mut oqaatigaa. Naalakkersuisullu tamanna iliuuseqarfiginissaanut suliniutinik arlalinnik ingerlataqarnerarlugit.

Atuaruk: Sara Olsvig: Meeqqanut akilersuutit atorunnaarsinneqarnerat aaqqiissutissaanngilaq

Powered by Labrador CMS