Asii inorsartitsisoq

Kommuneqarfik Sermersuumi innuttaasut qineqqusaarnermut sakkortusinnaasumut malinnaapput. Qanittumilumi puiorneqarallarunnanngitsumik.

Eqqunngitsumik pasilliinermut pasineq, nakkutilliisunut naammagittalliornerit, aviisi tusagassiornermi maalaartarfimmut suliassanngortinneqartoq, Naalakkersuisuillu siulittaasuata illoqarfiit pingaarnersaataa suliniutaa Siorarsiorfik pillugu tapersersuinngitsoq.

IA-p borgmesteriutitaata Asii Chemnitz Narupip qineqqusaarutigilluarsimasaa.

Qinersisartut oqariartuuteqarteerput.

Asii Chemnitz Narup, siullermik 2008-imi borgmesterinngortoq ukiuni sisamani ingerlaqqinnissaminut piareersimavoq. Politikkikkut amerlanerussuteqarnissaq qulakkeerneqareersimavoq, qineqqusaarnerummi nalaani Demokraatit IA-mik suleqateqarnertik attatiinnarniarlugu oqariartuuteqarsimapput. Neriorsuisimanerli qinersinerup unnukkuani suli attanneqartoq, Demokraatit siulittaasuata Randi Vestergaard Evaldsenip oqaatigaa. Kommunimut qinersinermi partiit taakku tamarmik siuariaateqarput.

- Qinersinerup inernera qujamasuutigaara, illoqarfiillu ineriartortinneqarnissaanut suliniut Siorarsiorfimmut tapersiinertut paasivara, tamannalu Nuummi inissialiornerpassuarnik malitseqasslluni. Anneruniajuinneq politikkikkut ingerlatseriaasera tatigineqaatigisimassavara. Ilungersorlungalu anguniarsimavara. Saniatigut suliffeqarpunga. Borgmesteriuneq ataavartumik suliffiuvoq. Sapaatip akunneranut 65 tiimiupput saniatigulli angalanerpassuit, Asii Chemnitz Narup oqarpoq. Asiip piaartumik partiinik oqaloqateqarnissaminut qaaqqusiniarpoq, isertuutinngilaalu Demokraatinik suleqateqarnissaq kajumeralugu.

- Demokraatit suleqatiginerisigut naammassisarpassuaqarpugut, Asii Chemnitz Narup oqarpoq. Asii pingajussaanik borgmesteriulerpoq.

Demokraatit siulittaasuat, Randi Vestergaard Evaldsen, kommunalbestyrelsimut ilaasortanngoqataasoq Asii Chemnitz Narupituulli illoqarfiup ineriartortinneqarnissaa qilaanaaraa.

- Illoqarfiit pingaanersaannut nussorneq unitsinneqarsinnaanngilaq. Taamaammat atungassarititaasut pitsaasariaqarput, sulili tamarmik inissinneqanngillat. Aningaasalersorneqarnissaa misissussavarput. Aqqulli allanngornavianngilaq, Demokraatit siulittaasuat oqarpoq. Partiillu qinersinermi siuariarnera piareersarluarsimanermik ersarissumillu politikkikkut anguniakkanik oqariartuuteqarnerup takussutissaringaa isumaqarluni.

Illoqafiit pingaanersaanni siusinnerusukkut borgmesteriuteqartarsimasoq Siumut, IA-mut ajorsaqqippoq. Partiillu qineqqusaartitaata Martha Lund Olsen qinersineq ajortuinnaanngitsoq oqaatigaa.

- Soorunami nuannaarutigaara qinersisartunit tatigineqarlunga kommunalbestyrelsimi inissaqartinneqarnera. Ajuusaarnarporli partiip tunuariaateqarsimanera. Qineqqusaarnermi ersarissumik oqariartuuteqannginnerput patsisaasinnaavoq, kinalu borgmesterimut piukkunneripput. Siorarsiorfimmut isumaqatigiinnginneq aamma pissutaasinnaasoq, Martha Lund Olsen oqarpoq.