inissiat
Asii: Inissianik pisariaqartitsineq annertuvoq
Kommuneqarfik Sermersuumi borgmesterip Asii Chemnitz Narupip eqqumiigaa, Naalakkersuisut taamaallaat Sisimiuni, Ilulissani Qaqortumilu inissianik assigiinngitsunik sanaartortoqarnissaanik pilersaaruteqarnerat, naak Nuummi pisariaqartitsisoqarnerpaajugaluartoq
Ineqarnermut Naalakkersuisoq Siverth K. Heilmann Atassut tusagassiortunik katersuutsitsivoq, ineqarnermullu tunngasuni suliassat saqqummiullugit. Inissianik nutarterisoqarnissaanut tunngatillugu Kommuneqarfik Sermersuumi pisariaqartitsisoqarnerpaajusoq erseqqissumik oqaatigineqarpoq, pisariaqartitsinerlu tunngavigalugu Naalakkersuisut sanaartortitsinissaq nutarterinissarlu isumaginiaraat.
Taamaakkaluartoq Kommuneqarfik Sermersooq qaangiinnarneqarpoq, inissianik assigiinngitsunik sanaartornissaq eqqartorneqalermat. Tamanna borgmesterimit eqqumiiginartinneqarpoq.
-Isumaqarpunga Ineqarnermut Naalakkersuisup kisitsisinik assigiinngitsunik tigussaasunik saqqummiussaqarnera eqqumiitsoq, qularutissaanngitsumillu Kommuneqarfik Sermersuumi nutarterisoqarnissaa erseqqilluinnartumik takuneqarsinnaasoq, taamaaseriarlunilu kommunini allani inissianik assigiinngitsunik sanaartortoqarnissaanik siunnersuuteqarpoq, Kommuneqarfik Sermersooq minillugu, Asii Chemnitz Narup oqarpoq.
Sermersuumi utaqqisorpassuit
Borgmesterillu eqqumiiginartitsinera tupinnanngilluinnarpoq. Tassami kisimi Sermersuumi nutarterisoqarnissaanik pisariaqartitsineq annertuvoq – kommunimilu inissarsiorlutik utaqqisut allattorsimaffiannut allatsissimasut amerlasoorujussuupput.
Kommunip nammineq inissiaatileqatigiiffiani Iserit A/S-imi maannakkorpiaq innuttaasut inissaminnik Asii Chemnitzip kisitsisaatai malillugit utaqqisut 2.039-nik amerlassuseqarput. Taakkunannga Nuup illoqarfianiinnaq utaqqisut 1.639-nik amerlassuseqarlutik. Tassunga innuttaasut amerlaqisut ini A/S-imut utaqqisunut allatsissimasut ilanngunneqassapput.
Misissuinerit 2015-imi naammassissapput
- Allatut oqaatigalugu, Kommuneqarfik Sermersuumi inissianik pisariaqartitsineq ernumanartorujussuuvoq, Ineqarnermullu Naalakkersuisup pisariaqartitsiffiusuni inissialiortitsisoqarnissaanik oqarnera naapertuutinngilaq, illua´tungaatigullu siunnersuutigalugu, Nuummi inissianik assigiinngitsunik sanaartortoqassanngitsoq. Neriuutigilluinnarpara tamanna puiguisoqarsimaneranik peqquteqartoq, Asii Chemnitz Narup oqarpoq nangillunilu:
- Aammattaaq sammineqartariaqarpoq Kalaallit Nunaanni nunarsuarmiullu akornanni naliginnaasuummat nunaqarfinniit illoqarfinnut nuujorarneq. Tamanna isumaqarpoq inissanik Nuummi pisariaqartitsineq ullumikkumiit annertunerulerumaartoq. Tamanna aamma ilimanarpoq Tasiilami, kommune-p Tunumi illoqarfik annersaat.
Misissuisitsisoqarnissanik pilersaaruteqartoqarnera Asii Chemnitz Narupimit naammagisimaarneqarpoq, taamaattorli misissuisitsinerup aatsaat 2015-imi naammassineqarnissaa uggornartoqartillugu.