Tuesday, November 14, 2017 - 13:46

Asii: Inatsisiliupallannermi avataaniit suliartortut salliutinneqarput

Assi.: Leiff Josefsen
Inatsit mittarfiliortitsinermi millionilikkuutaanik Namminsorlutik Oqartussanut qulakkeerinnittussap kingunerissavaa, avataaneersut nunaqavissuniit sulisorineqarnissaat ajornannginnerusoq.

Borgmester Asii Chemnitz Narupip (IA) inatsissatut siunnersuut, ulluni makkuni Inatsisartuni tuaviuunneqartoq, isornartorsiorpaa.

- Tusarsaanngitsumik suleriaaseq, borgmesteri inatsissatut siunnersuut pillugu Sermitsiaq.AG-mut oqarpoq, siunnersuut aallaqqaammut tusarniaassutigineqartussaasimanngikkaluarpoq, ataasinngormalli kommunit tusarniaanermut akissuteqarsinnaanerat nalunaaquttap akunneri arfineq-marlunni periarfissinneqarput.

Siunnersuut, immikkut iluanaarutigineqartuni nunap karsianut qulakkeerinnittussaq, mittarfiliornerit nunaqavissunit sanaartorneqannginnissaat, taassuma ernumassutigaa.

Siunnersuummimi ilanngunneqarsimavoq, avataaniit suliartortut, mittarfilioqataassagunik, 35 procentiinnarmik akileraartinneqassasut. Akileraarummik taama pilerisaarineq avataaniit aningaasaliisartut pilerisaarniarlugit isumassarsiarineqarsimavoq.

- Sulisunik avataaneersunik atorfinitsitsisinnaanerup kalaallinik sulisoqarnermiit ajornannginnerulernissaa, inatsisissatut siunnersuummi eqqanartoqartippara. Tamannami innuttaasutta salliutillugit suliffissaqartinnissaannut siunertatsinnut naapertuutinngilaq, Sermersuup borgmesteria tusagassiuutinut nalunaarummi allappoq.

Aningaasallu kommunit avaqqullugit tamakkerlugit nunap karsianut tutsinneqarniarneri aammattaaq narrassimaarutigaa.

- Mittarfiliorneq iluatsinniarlugu Kommuneqarfik Sermersuup annertuutigut akuersaagassaqartariaqarnissaa qularnanngilaq, siunnersuutigissuarali ataatsimoorluta oqaloqaigiissutigissagipput aningaasalersuinermi qanoq tamatta pilliuteqarsinnaanerput, akileraartarnermi inatsisit taamak sakkortutigisumik kingunissaallu misissoqqaarnagit imatut allanngortiternagit, taanna nangilluni allappoq.

Seneste nyheder / Nutaarsiassat kingulliit