Asii: Illoqarfiit pingaarnersaannut suliniut ingerlaannassaaq

Siorarsiorfimmi suliniut kommunalbestyrelsip siuliani isumaqatigiissutaagaluartoq kommunalbestyrelsimut qineqqusaarnermi sakkortuumik isornartorsiorneqarpoq. Taamaattoq Inuit Ataqatigiit, Demokraatit aamma Atassutip akornanni suleqatigiinnissamik isumaqatigiissummi pilersaarutit periarfissallu ingerlateqqinnissaat isumaqatigiissutigineqarpoq. Kommuni – allallumi Kalaallit Nunaat – najugaqarfigissallugu, inuuffigissallugu meeqqiorfigissallugulu orniginartoq pilersissagutsigu, suliniutit taamaattut piviusunngortissinnaasariaqarpagut, Asii Chemnitz Narup kommuninut qinersinermi taaguunneqarnerpaaq tusagassiuutinut nalunaarummi oqarpq.

Pilersaarutinik erseqqissaaneq
Nalunaaqutaq 11.00 tusagassiortunik katersuutitsinissaq sioqqullugu tusagassiuutinut nalunaarut nassiunneqarpoq, tassani partiit pingasut ukiuni sisamani tulliuttuni politikkissartik saqqummiutissavaat.

Inissialiornissamut suliniuterujussuaq 3-4 milliardit koruuninik akeqartussaq pillugu borgmesteri ima oqaaseqaqqippoq:

- Partiit suleqatigiit pilersaarutinik inerisaaqqilluni erseqqissaallunilu suliat ingerlateqqissavaat, minnerunngitsumillu pisortat namminersortullu aningaasalersueqatigiissinnaanerannik periarfissat, aningaasaliisinnaasunillu arlalinnit maannamut soqutigineqalereersut, malitseqartinnissaat suliarissallugit. Kommuneqarfik Sermersuumi qinersisartut qinersineq aqqutigalugu piginnaatitsinerannut qamannga pisumik qujamasuppunga – tamannami aamma tassaavoq aningaasaliisartunut erseqqissumik nalunaarut, kommunip matuma politikkikkullu amerlanerussuteqartut sammivik taanna kissaatigigaat, aamma politikkikkut pisariaqartumik aalaakkaasuunissaq ataaqatigiissumillu aningaasaqarnissaq – aamma qinersinerup kingorna – erseqqilluinnartumik nalunaarutigineqarpoq.

Kim Kielsen: Isumaannakkut pilersaarusiaq
Qineqqusaartoqarnerata nalaani Siumup siulittaasuata Kim Kielsenip suliniut akerlilerlugu ''isumaannakkut pilersaarutaanerarpaa''. Tamannalu qineqqusaarnerup ingerlanerani Siumumit kommunalbestyrelsimut ilaasortaatitaasa borgmesteri kommuninut nakkutilliisoqarfimmut misissugassanngortippaat, suliniut aqutsinikkut eqqortumik suliarineqarsimanngitsoq isumaqaramik.

Aamma atuaruk: Kielsen Nuummi suliniut pillugu: Isumaannakkut pilersaarut

- Siorarsiorfimmi suliniut aqqutigalugu inissiat nutaat 1600-t pilersinneqassapput, taamatullu meeqqeriviit atuarfiillu il.il. Tamanna imminermini soorunami naammanngikkaluarluni, Nuup siunissami unamminartunik aniguisarnissaanut piumasaqataavoq pisariaqartoq. Illoqarfik alliartorpoq, nuuttoqartarnera meeqqallu amerliartornerat pissutigalugit. Ilinniarfissat, suliffissat inuunermilu pisariaqartitat illussaqarfiusut il.il., pisariaqartitanik pineqartunik matussusiisinnaasut pilersittariaqarpagut pilersittussaallugillumi. Taamaammat naammagisimaaqaraa Siorarsiorfimmi suliniutip ingerlaqqinnissaanut atatillugu partiit pingasuulluta ingerlaannaq isumaqatigiissinnaagatta, pilersaarutillu piviusunngortinniarneranni tigussaasutigut suliaqarnissatsinnut kajumissuseqarluaqaagut, borgmesteri Kommuneqarfik Sermersuumi pingajussaanik qinigaaffeqalersoq allappoq.