Asii Chemnitz Narup parteeqataata illersorpaa

Sapaatip akunnerata siuliani Sermitsiaq.AG-p Jens-Erik Kirkegaardi (S), Kommuneqarfik Sermersuumi kommunalbestyrelsemut qineqqusaaqataasoq, borgmesteri Asii Chemnitz Narupi arriippallaarnerarlugu uparuaasoq allaaseraa.

- Kommuneqarfik Sermersuup borgmesteria, Asii Chemnitz Narup (IA) Nuummi mittarfiup allilerneqarnissaanut aningaasaliisussarsiornermi sanngiippallaarsimavoq, Jens-Erik Kirkegaardi ilaatigut taama oqapoq.

Atuaruk: Siumumi politikeri Asiimut isorinnittoq: Ilatsiinnarpallaarputit

Ineriartortitsisoqarnissaa kissaatiginngikkaa

Kommuneqarfik Sermersuumi Kommunabestyrelsemi ilaasortaq Malene Lynge illersuivoq, Jens Erik Kirkegaardip (S), borgmesteri Asii Chemnitz Narupimut isornartorsiuvinera tupigusuutigaa.

- Naalakkersuisut, Jens-Erik Kirkegaardip ilaasortaaffigisaasa, Nuup ineriartornissaanik kissaateqanngilluinnarnerat, akerlianilli siunertaqarnerat, eqqaamaqqissaarpara, Malene Lynge, tusagassiuutinut allappoq.

Atuaruk: Mittarfinnik alliliisoqarnissaq kommuneqarfiit marluk aallartipallakkusuppaat

Isornartorsiuvinera paasinngilaa

Kommuneqarfik Sermersuup ukiuni pingasuni Nuummi mittarfiup allineqarnissaata aningaasalersorneqarnissaanut suliniuteqarnissamut akuerineqarnissi anguniarsimagaa erseqqissaatigaa.

- Kisiannili Naalakkersuisut naaggaarluinnarput. Inatsisartut angallannermut ataatsimiititaliaanni ilaasortatut Jens-Erik Kirkegaardip tamanna nalunngilluinnaraluarpaa, Malene Lynge oqarpoq.

2013-mi qineqqusaarnerit aallartimmata kommune sanaartortitsissasoq Asii Chemnitz Narupi oqarpoq, tamakku Jens-Erik Kirkegaardip ilanngullugit apeqquserpai.

- Maannalu ukiut sisamat qaangiummata ataasinnguamilluunniit piariingaqarsimanngilaq, Jens-Erik Kirkegaard taama oqarpoq.

Jens-Erik Kirkegaardip oqaaseqarnera Malene Lyngep paasisinnaanngilaa.

Atuaruk: Siorarsiorfik – qineqqussaarnermi suliassaq pitsaavallaanngitsoq

Sanaartungassat

- 2012-imi aningaasanut inatsisikkut aningaasaliissutit 170 millioner kronit tungaannut peerneqarnerannut Kirkegaard akisussaaqataavoq. Aningaasat taakkua takunngisaannarpavut. Akerlianilli amerligaluttuinnartunik nalimmassaanermut akiliuteqartitaasarsimalluta. 170 millioner kronit Nuummi atuarfiit pingasut iluarsartuunneqarnissaannut immikkoortitaasimagaluit, Malene Lynge tikkuaavoq.

Kommuneqarfik Sermersuup innarluutilinnut sullissiviit nutaat tallimat, ilanngullugit najugaqatigiiffiit, sungiusarnermut neqeroorutit utoqqarnullu immikkut paaqqutarisariaqartunut angerlarsimaffiillu 12-it, sanaartukkat piareersimasai eqqaavai.

- 2017-imullu Nuummi utoqqaat illuanni immikkut paaqqutarisariaqartunut inissat arfinillit, Tasiilami ulluunerani inissat marluk, Paamiuni utoqqaat illuannik nutaamik sanaartornerup aallartinnera, kiisalu Nuummi Qinngutsinni inuusuttunut inissiat 23-it taakkununnga aamma ilaapput.

- Kiisalu Kommuneqarfik Sermersuup karsia suliassanut Nuup avataaniittunut ilanngartuiffigineqartuaraluartoq, kommunimi kommunip inissialiai nutaat 100 missaat atuutsinneqalerput, Malene Lynge oqarpoq.

Naggasillunilu aperaluni:

- Taava, Jens- Erik Kirkegaard aperisariaqarpara Naalakkersuisut ilaasortaaffigisai,kanngunartuliornerit saniasigut, sunik angusaqarsimanersut?