Arctic Winter Games
Asii AWG-mit bloggerpoq: Asii AWG-mit bloggerpoq: Nunatsinnut soqutiginninneq annertuvoq
Borgmester Asii Chemnitz Narup Arctic Winter Games-imit naareersumit bloggerpoq. Aana ilanngussaasa arfineq-pingajuat
2016-imi Nuummi Arctic Winter Gameseqarnissaanut aallartisaassutigalugu Kommuneqarfik Sermersuumi borgmesteri Asii Chemnitz Narup, Inuit Ataqatigiit, Arctic Winter Gamesimi naammassereersumi Alaskami illoqarfimmi Fairbanks-imiinnerani bloggertaassaaq - bloggip arfineq-pingajussaat aana:
Tallimanngormat ullut tamaasa ataatsimiinnermik aallarnerparput. Maliina Abelsenip AWG2016 Nuummi ingerlanneqalerpat oqariartaatissat pilersaarutillu allat saqqummiuppai, aaqqissuussisuunissatsinnullu uangalu nammineq eqqarsaatinnik ilassuteqalaarpunga. Nuup Kalaallit Nunaatalu soqutigineqarnerat annertoorujussuuvoq. Tamatta tapersersorneqarnerput malugisinnaavarput. Tamanna sapiissuseqalersitsillunilu sulerusussuseqalersitsivoq.
Borgmester Luke Hopkins ullup qeqqasioriartoqqusivoq, timersortartut kulturimillu suliaqartut tamarmik neriartortarfiannut. Peqqinnartorpassuarnik qinigassaqarpoq. Nerinermi atortut tamarmik ataasiaannartagaapput, atornikuusakkalu igissallugit eqqarsanngitsuunngilanga: eqqaamasassatta ilaat, igitassat qaavisigut eqqartagassat Nuummi inuit 2000-inik ilappata aamma suliassaassapput.
Luke Hopkinsimik ataatsimeeqateqarnera Fairbanksip piareersarneranut tunngassuteqarneruvoq, nammineq inissisimanera, aaqqissuussisuunermi nuannersut aammalu sapinngisamik amerlasuut suleqataatinnissaasa pingaaruteqassusiat. AWG-mi aaqqissuussisuunerup nassataasa ilaat, kaaviaartitat amerlisimanerat arlaleriarluni uteqattaarpaa. Fairbanksimut qanoq aningaasatigut iluanaarutaatiginissaanut nammineq siunnersuutissaqarpoq, aammalu niuertut maaniittoq periarfissamik tamassuminnga maannangaaq eqqarsaateqalereernissaat kaammattuutigivaa.
Tallimanngorneq unnukkut kulturikkut naggataarnersiornermi najuuppugut. Nunat peqataatitsisut inuusuttortaat tamarmik minutsinik qulinik sivisussusilimmik takutitsisarput – qangatut qitinneq erinarsornerlu takutikkiarlugit – nutaaliaanerusunut. Uagut nammineq inuusuttortavut kusanarluinnartumik takutitsipput, pitsaasumillu ilitsersorneqarsimallutik. Imarisaa saqqummiunneqarneralu inuusuttunut allanut torrallavinneqarpoq. Pikkorissorpassuit WOUW !!! inuusuttunnguit nuannersut, tamassinnut qujanarujussuaq.
Kulturitta AWG-mut ilaanera pingaaruteqarpoq. Kulturikkut issittumi paarlaateqatigiittarnikkut ataqatigiinnermik nukittuunngortitsisarpoq, inuusuttullu akornanni ilisimasanik siammarterisarluni, ataatsimut oqaluttuarisaanitsinnik assigiinngissutitsinnillu. Oqaluttuarisaanermi kulturikkullu attaveqaatit inuusuttut nammineerlutik ineriartortittarpaat.