Asii aamma Palle: Kommunit imminnut pisariaqartipput

Kommunit kattuffigisimasaat KANUKOKA, taassumalu allaffissornikkut ingerlatsivia maanna oqaluttuaannanngornikuuvoq. Kommunit nutaamik suleqatigiinnissaminnik aallartikkusupput, tassami ataatsimoorfigisinnaasaat amerlaqimmata arlaatigut aaqqissuussamik suleqatigiinnissaq pisariaqartittuaannassagamikku.

KANUKOKA, kommunit kattuffigisimasaat naggataatigut aaqqiagiinngiffiunikooqaaq, tassani pingaartumik partiit qalipaataat aammalu politikkikkut anguniakkat assigiinngisitaarnerat pissutaallutik kattuffik ajalusoorluni kommunit ilusaatut ingerlatiinnassallugu annaassinnaajunnaagaat. Maannali nutaamik suleqatigiilernissaq anguniarlugu borgmesterit Palle Jerimiassen (S) Avannaata Kommunianeersoq aammalu Asii Chemnitz Narup (IA) Kommuneqarfik Sermersuumeersoq, kommunit ataatsimoorfigisinnaasaannik suleqatigiinnermik aallarnisaanialerput.

Aviisi Sermitsiaq allappoq.

- Immitsinnut atorfissaqartippugut, kommunit imminnut atorfissaqartipput taamaammallu qulakkeertariaqarparput suleqatigiinnissamut tunngavissaq kommunit tamarmik peqataaffigisinnaasaat, tamannalu pissaaq allaffissornerujussuarmik immikkut pilersitsisoqanngikkaluarluni, Asii Chemnitz Narup (IA) aamma Palle Jerimiassen (S) Ilulissani ataatsimeeqatigeeqqammertut isumaqatigiillutik oqarput. Tassani ataatsimiinnermi aamma mittarfissualiornissanut tunngassuteqartut eqqartorneqarput.

Qularnanngilaq nunatsinni kommunit ulluinnarni innuttaasunik sullissinerminni ataatsimoortumik unammilligassaqartut. Naak kommunit kattuffigisimasartik aqqutigalugu unammilligassat pillugit ataatsimoorsinnaajunnaarsimagaluartut, pisariaqartinneqarpoq kommunit ataatsimoorlutik suleqatigiiffigisinnaasaannik pilersitsinissaq, maannalu tassa Palle Jerimiassen (S) aammalu Asii Chemnitz Narup (IA) kommunit sinnerinik aggersaassallutik piareersaallutik aallartipput, taamaalillutik nunatsinni kommunit tallimaasut suleqatigiissutissaminnik ilusilersueqatigiissinnaalissapput.

Powered by Labrador CMS