Asiaq nutaamik pisortartaarpoq

Naalakkersuisut aalajangerput, cand. geom. Bo Naamansen Kalaallit Nunaata misissueqqaartarfiani Asiami pisortatut atorfimmik neqeroorfigineqassasoq.

Taanna Asiami pisortatut atorfimmi piaarnerpaamik sulilissaaq.

Namminersorlutik Oqartussat tamanna nalunaarutigaat.

Sivisuumik atorfilik
Bo Naamansen sivisuumik Asiami atorfeqarnikuuvoq, matuma ataani Asiap niuernermi suliassaqarfiata iluani aqutsisutut atorfiit arlallit suliffigisimallugit. Maannakkorpiaq nunap assinga tunngaviusoq pillugu suliaqarfiup iluani pilersaarusiami aqutsisutut atorfeqarpoq.

- Bo Naamansen Asiami pisortatut nutaatut atorfinitsinneqarnissaanut aalajangerneq assut iluarisimaarpara. Pimoorussisuuvoq kiisalu Asiap iluani suliassaqarfinnik ilisimasaqarluarlunilu misilittagaqarluarluni. Siunissami suleqatigiilluarnissamut qilanaarpunga, aningaasaqarnermut, aatsitassanut nunannullu allanut naalakkersuisoq Vittus Qujaukitsoq oqarpoq.

Asiami pisortatut atorfimmut qinnuteqartut aqqaniliupput, taakkunani qinnuteqartut tallimat oqaloqatiginninnissamut aggersarneqarsimallutik.