Aalisarneq
Asiamit pisisartumit tikeraartoqarneq isertitaqarnerulernermik kinguneqarsinnaavoq
Royal Greenlandip pisisartuisa ilaat Alimex Seafood A/S Royal Greenlandip tunisassiorfiinut arlalinnut juulip aallaqqaataata missaani tikeraarpoq
Alimex Seafood A/S-imi pisortaanerup Kun Songip Royal Greenlandip Sisimiuni, Sarfannguani, Maniitsumi Nuummilu saarullinnik ilivitsunik qerinasuartitanik tunisassioriaasianik malinnaanissani kissaatigisimavaa.
Royal Greenlandilu naapertorlugu, tunisassiat tunisassiaasalu pitsaassusai Kun Songimit naammagisimaarneqarlutillu ajasoorutigineqarput.
Suliffeqarfissuaq Royal Greenland nittartakkamini allappoq.
Pisisartoq pingaarutilik
- Pisisartorput Kinameersoq tunisassioriaaserput takornarniarlugu tikeraarpoq (...), Royal Greenlandimi tunisassiassalerinermi ingerlatsisoq Niels Wann Jensen oqarpoq.
- Pisisartutta tunisassiorfiutitsinni saarullinnik ilivitsunik qerinasuartitsilluta tunisassiortarnivut malinnaavigai, Maniitsumili saarullinnik Nutaanik tunisassiornerput aamma malinnaavigaa.
Suliffeqarfik nunarsuarmi tamarmi tunisassiornermik tuniniaanermillu aallutaqartoq, Alimex Seafood A/S, aalisakkanik qerinasuartillugit tunisassianik Europami igaffissuaqarfinnut niuertarfeqarfinnullu pilersuisuusarpoq aamma Royal Greenlandip Kinami pisisartuini pisinerpaasartut tulleraa.
Isertitaqarnerulernissamik neriuuteqarneq
Royal Greenlandip taamatut assigiinngitsunit pisisartunit tikeraartoqarnikkut tatiginninneq annertusillugu, taamaalillunilu siunissami immaqa annerusumik pisiumassuseqalernissamik kinguneqarnissaa neriuutigaa.
Saarulliit 15.042 tons Royal Greenlandip sineriammi tunisassiorfiinut 2014-15-imi tunineqarput. 2013-14-imi tunineqartunut sanilliullugit 30 procentit missaani annertunerupput.
Atuaruk: Aalisarnerit tamarmik siuariarfiusut