pissaaneqarluartut
Asiami nunat Issittoq suleqatigiissutigingaat
Kina, Japan Korea Kujallerlu Issittumi Siunnersuisoqatigiit avaqqullugit issittoq pillugu oqalliffimmik pilersitsinissaat ilimanartoq. Cryopoliticsimi blog taama allaaserinnippoq.
Juunip ulluisa arfineq pingajuanni Kina, Korea Kujalleq aamma Japan Tokyomi Issittoq pillugu eqqartueqatigiipput.
Nunat taakku Asiami aningaasaqarnikkut nukittunerpaapput, massakkullu Issittoq pillugu suleqatigiinnertik annertusarnialerlugu. Naapeqatigiinnissaq ukiup tulliani Kina pisussatut pilersaarutigereersimavaat.
Nakkutilliisuunertik iluarisimaanngikkaat
Asiamiut suleqatigiinnerminnik nukittorsaanertik Issittumi Siunnersuisoqatigiinni nakkutilliisutut inissinneqarsimanerminnik qisuariaatigaat, tamanna ingammik Kinap iluarisimaanngeqaa.
Issittoq pillugu ilisimatusartoq Mia Bennet Cryopoliticsimi blog-imini taama naliliivoq.
Nunat taakku pingasut Issittumi mingutsitsinermik silaannaallu allanngoriartorneranik, eqqornerusumilluunniit Issittup imartaani misissuinissartik naapeqatigiinnerminni isumaqatigiissutigaat.
Issittumi soqutigisanut piumasat
Krav på arktiske interesser
Issittup imartaani nunat taakku pingasut Issittumi soqutigisamminnik aallussiniaraluarput, naak piffimmi piumasaqaataat atuutinneqalersinnaanngikkaluartut, Mia Bennet naliliivoq.
Taamaasiornikkut Issittumi imartaani akisussaaffik sineriammiikkunnaarluni nunani tamalaaniilissalluni.
Ataatsimoorussamik nunat taakku pingasut Asiaminngaanneersut nalunaarutaanni aalisarsinnaanermut angallaffittulli periarfissat tikkuarpaat.
Issittumi Siunnersuisoqatigiinnut unammilertit?
Nunat pingasut 2013-mi Singapore aamma India peqatigalugit Issittumi Siunnersuisoqatigiinni nakkutilliisussanngortinneqaramik, Issittumi allanik siunnersuisoqatigiinni pilersitsisoqannginnissaa ilaatigut anguniangaasimavoq.
Eqqasuut tamanna piviusunngortinneqariaannaasoq Mia Bennert naliliivoq.