Aqquserngit
Asfalt allaaneq ujartorpaat
Nuup aqquserngini asfaltilersornerinnarmut 7 millioner koruunit Kommuneqarfik Sermersuup ukiormanna atussavai. Asfaltimik attartunermik ujarlerneq ingerlavoq
Asfalti aappalugusersumik qalipaatilik Nuummi aqquserngit ilaanni atorneqartoq asfaltimit naliginnaasumit attartuneruvoq. Taamaakkaluartoq suli akisuallaarpoq taamaammat asfalti akikinnerullunilu attartunerusoq suli nassaariniarneqarpoq.
Nuup aqquserngisa qalliutaat asfalt aqqusinnerisut piaarlugu aallartereerpaat tamannalu pereerpat asfalt nutaaq kuineqassaaq. Akunnaallillugu naatsorsoraanni Nuup illoqarfiinnaa eqqarsaatigalugu tamanna ukiormanna 7 millioner koruuninik akeqassangatinneqarpoq. Taamammat asfalt allaanerusoq siorna aqquserngit ilaannut ikkunneqarpoq paasiniarlugu asfaltimi naliginnaasumit attartunerunersoq.
Nunatta ujaraa
- Asfalti nutaaq pisoqqamit attartuneruvoq. Kisianni suli akisuallaarpoq. Aqqusinerni tamani atornera imminut akilersinnaassappat aqqanileriaammik akikinnerusariaqarpoq. Kisianni asfalti nutaaq suli misilerarparput piffissarlu sivisunerusoq qaangiuppat aatsaat inaarutaasumik naqissusiisinnaalissaagut, Kommuneqarfik Sermersuumi suliamut akisussaasoq Christian Dyrbjerg Andersen Sermitsiaq.AG-mut oqarpoq.
Taamaakkaluartoq asfaltimik akikinnerusumik attartunerusumillu ujarlerneq suli ingerlavoq. Nuup ujaraasa ilaat Kommuneqarfik Sermersuup aqquserngit qalliutaannik Danmarkimi suliaqartartut annersaannut Colas-imut nassiuppaa piukkunnassusaa uuttorniarlugu.
- Aaqqiissutissani pitsaanerpaajussagaluarpoq maani ujaqqat arlaat attartunerusoq atorsinnaagutsigu, Christian Dyrbjerg Andersen oqarpoq.
Sanaartortut biilerujussui minnerunngitsumillu biilit assakaasui ukiorsiutit naqqullit aqquserngup asfaltitaanik nungullarsaasarput.