Asasakka Namminersorlutik Oqartussat: Aningaasaatikka qaqugu tigussavakka?

Peqqissaasut ilaat maanna qaammatini 18-ini qaammatit tamaasa akissarsiaminni saniatigut 3.000 koruunit pissarsiarinngitsooqattaartareerpaat.

Suliatigut peqatigiiffimmi PPK-mi ilaasortat 650-it aningaasarsiassatik eqqortut tigunissaannut suli utaqqipput, taakku Namminersorlutik Oqartussat aamma PPK-p qangali isumaqatigiissutaanni atsiorneqarsimasumi allaqqapput. Ilaasortat ilaat pisortani atorfimminni 50.000 koruunit sinnerlugit pissaqarput.

Namminersorlutik Oqartussat assigiissaarinermik suliniummik atuutsitsilernissamik kissaateqarnerannut atatillugu, inaarutaasussat suli inissinnginnerannik kinguneqarpoq, naak akissaatissanut isumaqatigiissut atsiorneqareerluni aamma kingorna januaarimi ukiormanna taasissutigineqarluni akuerineqareeraluartoq.

Pakatsineq aamma kamanneq

Peqqissaasut peqatigiiffianni PPK-mi, peqqinnissaqarfimmi assigiinngitsunik sulisunik 650-nik ilaasortaqartumi, pakatsineq aamma kamanneq annerpaaffissaminut pilerpoq.

Akissarsiassatik pineq ajorpaat. Tamatuma saniatigut sulineq tatisimaneqaleqqavoq, Peqqinnissaqarfiup peqqissaasut atorfii inuttaqanngitsut inuttalernissaat ajornakusoortimmagit.

- Ilaasortanit pakatseqqasunit sianeqattaarfigineqaannavippunga. Kisainni uagut suliamik kigaallassaasuunngilagut. Aningaasaqarnermut Sulisoqarnermullu Aqutsisoqarfimmi sulisut unammillernartoqartitsinerat uanga aaqqitassarinngilara, Ken Jensen, Sermitsiaq.AG-mut oqarpoq. Suliap naammassingajalerneranik taanna aqutsisoqarfimmit oqarfigineqartuarsimavoq.

Suliffimmi atukkat tamaviaarnarsisikkaat

Taassuma ilaasortai sulisunik amigaateqarneq pissutigalugu tamaviaarput, tamannalu akissaatinut isumaqatigiissutip qularnartoqarneranut attuumassuteqarpoq.

- Namminersorlutik Oqartussat suliaq naammassinngippagu, taamaallaat akissaatinut isumaqatigiissummut marsip naanerani 2016-imi qaangiuttumut innersuussiinnarsinnaavugut. Tamanna tunngavigalugu peqqissaasut suliartorusuttut Nunatsinnukarusunneq ajorput, tamatumalu pissutsit uanga ilaasortannut ajornerulersippaa, aammattaaq napparsimmaveqarfinnut innuttaasunullu, suliatigut peqatigiiffimmi siulittaasoq naqissusiivoq.

Aningaasaqarnermut Sulisoqarnermullu Aqutsisoqarfimmi pisortaq Lise Lennert Olsen, suliaq pillugu Sermitsiaq.AG-mut paasissutissanik ilanngussaqarnissaminut itigartitsivoq.

- Qanorluunniit apeqquteqarsinnaavutit, kisianni uanga oqaaseqarnianngilanga, Lise Lennert Olsen naatsumik taama oqarpoq.

Powered by Labrador CMS