Arsaattartut hashimik atuineq nassuerutigaat

Arsaattartut marlussuit klubbit kikkuunerinik taaneqanngitsuneersut GM-mut ilaaniaratik nalunaarput dopingimut hashimullu misilitsissagunik atuisutut paasisaanissartik ilimanarmat. Arsaattartut akisussaassutsimik takutitsisut arsaattartut kattuffiata GBU nersualaarpai klubbimik tusaamanerlunneqalernissaa pinngitsoortimmassuk.

Atuaruk: Arsaannermi GM-rtoqarnerani nukkassaatinut ikiaroornartumullu misissuisoqassaaq

Arsaannermi GM ataasinngornermiit Nuummi pilerpat dopingimik hashimillu atuisoqarsinnaanera misissuiffigineqassaaq. Unammersuarnermut malittarisassat GBUp aamma sukaterpai GM-mi atornerluisunik paasisaasoqassappat GM-ip sinnera peqataasinnaajunnaarsinneqassaoq. Arsaattut marlunnit amerlanerit atornerluisutut paasisaappata iligiit tamarmik GM-ip sinnera peqataasinnaajunnaarsitaassapput.

Ajugaanerussaaq angisooq
Unammersuarnermut malittarisassat upernaaq klubbinut agguaanneqarput. Klubbiniillu GBU akissutisereerpoq.

- Nalunaarfigineqarpugut arsaattartut ilaat klubbiminnut nalunaarsimasut GM-mut peqataaniaratik hashimik atuisutut misissuinermi paasisaanissartik ilimanarsinnaammat. Aamma isumaqarpunga arsaattartut akisussaassutsimik taamatut takutitsinerat ajunngilluinnartoq klubbimik tusaamanerlunneqalernissaa pinngitsoortikkamikku, GBUp siulittaasua John Thorsen Sermitsiaq.AG-mut oqarpoq.

Hashimik dopingimillu atuinermut misissuinerit pissapput siumut nalunaaqqaarani pulaarnikkut imaluunniit nammineq arsaaffimmi unammisussat unamminerit sioqqullugit kingornaluunniit misissornerisigut. Arsaattartut misissortinnissamut akuersinngitsut aamma unammersuarnermi peqataasinnaajunnaarsitaassapput.

- Dopingimik hashimillu atornerluineq pitsaaliorniarlugu misissuisarneq aallartipparput. Inuusuttut hashi qimallugu arsaannermik toqqaanissaannut taamaasilluta ikiorsinnaagutsigut ajugaarujussuarsimassaagut, John Thorsen oqarpoq.