timersorneq
Arsaattarfiliornissaq taamaatinneqarpoq
Nunatsinni isiginnaartarfilimmik arsaattarfiliornissaq siunissami qaninnerusumi piviusunngortinnissaa qularnartoq
Anders Olsenimut (S) akissuteqaammi, aningaasaqarnermut inatsisip akuerineqarsimasoq aallaavingalugu arsaaffik qiterfarlugu tammakkerluguluunniit arsaattarfiliortoqarnissaa pilersaarutaanngitsoq Ilinniartitaanermut, Kultureqarnermut, Ilisimatusarnermut, Ilageeqarnermullu Naalakkersuisup Doris Jakobsen paasissutissiivoq.
Arsaattarfiliornissaq piviusunngortinneqassappat Naalakkersuisut kisimik isumalluutigineqaratik aningaasaateqarfiit allallu aningaasaleeqataasariaqartut Doris Jakobsen isumaqarpoq.
Tulleriiaarineq pisariaqarpoq
- Suliaq taama annertutigisoq pisortanit aningaasalersorneqarsinnaanngilaq, susassaqarfiit allat pisariaqartitsisut aningaasalersornerit allatut tulleriiaartinnagit. Doris Jakobsen (S) Anders Olsenimmut (S) ukiuni arlalinni arsaattarfiliortoqarnissaanik suliniuteqartumut akissuteqaammini taama allappoq.
Atuaruk: Nunatta arsaattarfissuassaanut alloriarneq siulleq
Suliniutiginninnissamut pilersaarusiami misissuinerit takutippaat, illoqarfiit marluk taamaallaat pilersitsinissamut piumasaqaatinut assigiinngitsunut tulluuttuusut, tassalu Nuuk aamma Ilulissat. Doris Jakobsenip (S) ilanngullugu erseqqissaatigaa.
Illoqarfiillu taakku marluk kisimik sooq arsaaffiliorfigineqarsinnaaneranni peqqutaatinneqarpoq nunap ataqatigiinnermut attaveqarfii. Arsaattarfiliornissamulli FIFAp piumasaqaatai aamma suunersut alakkarneqarput.