Arsaannermi GM: IT-79 Nuummeersoq aallartilluarpoq

Angutit arsaannermi GM-qarnissaannut anngunniunnermi Nuummeersut B-67 aamma IT-79 aallartilluarput. Pingasunngornermi unamminerni taakku tamarmik ajugaappput, Kâgssagssulli Maniitsumeersoq B-67-mut akiuulluarpoq.

Maniitsumi anngunniunnermi iligiit sisamat peqataapput. Tassaapput S-68 Sisiminiik, Kâgssagssuk Maniitsumik Nuummeersullu IT-79 aamma B-67.

Pingasunngornermi IT-79 S-68-mut 7-1-mik ajugaavoq muminnermi 4-0-mik siuareersimalluni.

Nuummiuinnaat unammilerput
B-67 aaqqissuisunut Kâgssagssummut Maniitsumeersumut unammivoq. Kâgssagssuk tupaallatsitsilluni unamminerup aallartinneranit minutsit pingasut ingerlariiginnartut 1-0-mut isertitsivoq. B-67-li aqutsinerulerpoq muminnissarlu sioqqullugu marlunnik isertitsilluni. B-67 suli siuaqqippoq 3-1-mut unamminerli naammassitinnagu Kâgssagssuk 2-3-mut isertitsivoq.

Sisamanngornermi pissanganartumik unammisoqartussaavoq Nuumminngaanneersut IT-79 aamma B-67 unammissammata. Tassani ajugaasut GM-mut anngunnissartik qanilleriangaatsiartussaavaat.

Unamminerup aappaani Kâgssagssuk S-68-mut unammissaaq. Kâgssagssuk anngussinnaanissaminut suli neriuutissaqarsinnaavoq S-68-mut ajugaasinnaaguni anngunniunnerillu siulliit Sisimiuni pimmata tassani ajugaaffigereernikuuaat.

Maniitsumi anngunniunneq tallimanngornermi naammassissaaq tassani IT-79 aamma Kâgssagssuk unammissammata kiisalu B-67 S-68-ilu unammissallutik. IT-79-ip aamma Kâgssagssuup unamminerat aalajangiisooratarsinnaavoq kikkut GM-mut Nuummi aggustip sisamaaniit pisussamut anngukkunaarnissaannut.

Assit ataani takukkit