Arsaannermi GM
Arsaannermi GM: Arnat GM-rnissaannut pisinnaajunnaartut
Arsaannermi arnat GM-qarneranni ataasinngornermi aallartittussami iligiit tallimat peqataassapput. Unamminerit tulleriiaarnerat takuuk
FC Malamuk Uummannameersoq aamma S-68 Sisimiuneersoq ammaanermi ataasinngornermi unammisapput arsaannermi arnat GM-qarnerat aallartippat. Unammersuarneq arfininngorpat naammassissaaq.
Arnat GM-qarnerannut iligiit 18-it nalunaarsimapput taakkunanngalu arfinillit pissartanngorniunnerit naggataarneqarneranni peqataassallutik tassanilu aaqqissuisutut S-68 toqqaannartumik anngunnikuuvoq. Peqataasussalli tamarmik arfinillit piareersimagaluarput taamaattoq UB-83 Upernavimmiit peqataasinnaajunnaarluni nalunaartariaqarluni angalaniarnikkut ajornartorsiuteqarneq pissutigalugu.
- UB-83 taartissarsiniarsimagaluarparput unammersuarnerilli taama qanillitigisut allamik taartissarsisinnaasimanagit, S-68-miit Villy Olsvig nalunaarpoq.
Finalemi unammiuartut
Taamaammat GM-ip naggataarneqarnerani peqataasut tallimaannaassapput taakkulu tamarmik imminnut unammissapput. Pointeqarnerit marluk arfininngornermi finalemi unammissapput. GM-ip naggataarneqarnerani peqataasut tassaassapput: FC Malamuk Uummannaq, I-69 Ilulissat, Kugsak-45 Qasigiannguit, S-68 Sisimiut aamma NÛK Nuummiik.
Ukiorpassuanngortuni NÛK Nuummiik aamma I-69 Ilulissaniik finalemut annguttarput. Iligiit taakku marluk 2002-miit 2009-p tungaanut tamatigut finalemut annguttarput. 2010-mi NÛK GM-imut anngutinngilaq taamaattorli 2011-miit 2013-mut tamatigut finalemi I-69-mut unammisarlutik.
Siorna Qeqertarsuarmi GM-rtoqarmat I-69 NÛK-mut ajugaavoq iligiillu taakku marluk ataasinngornermi ualikkut Sisimiuni unammissapput.
Aajuku ataasinngornermi Sisimiuni pisussat:
Nal. 15.00 ammaanersiorneq
Nal. 16.00 FC Malamuk – S-68
Nal. 18.00 NÛK – I-69.
GM-imit angusat assillit Sermitsiaq.AG-mi malinnaaffigisinnaavatit