Island Games

Arsaanneq: Angutit ajugaanerat siulleq

Angutit arsaalluni nunanut allanut unammisartut Ålandimut unamminerminni pingaarutilimmik ajugaapput

Malik Juhl Ålandimut isertitsinermi kingorna nuannaartoq

Island Gamesimi Jerseymi ingerlanneqartumi unamminermi siullermi Menorca-mut naligiiginnareerlutik kalaallit arsaalluni nunanut allanut unammisartut Ålandimut ajugaaniartussaapput.

Menorca-mut unamminermit tunioraalluarnerupput kinguarsimasullu illersuilluarmata akeqqat periarfissanik pilersitsiuminaatsitsipput.

Isertitaq siulleq minutsialunnguit ingerlariiginnartut isertinneqarpoq. Kalaallit arsaarinneriarlutik saassussimmata Frederik Funch inissaqarluarluni arsaq målit napasuata ungasinnerup eqqaatigut isertippaa. Unamminerup immikkoortuata aappaani Kalaallit Nunaata unammineq aquppaa. Minutsit qulit sinneruttut taartaalluni isertinneqarsimasoq Malk Juhlip saamia'tungaanit qeqqanuugaq niaqormillugu isertippaa.

Kalaallit Nunaat 2-0-mik ajugaavoq.

Sungiusaasoq naammagisimaarinnippoq

– Amerlasuutigut arsarluaqaagut. Unammineq tamaat arsariaaserput atorparput. Unammisartutta arsaq tigummisorujussuuvaat tunioraalluarlutillu. Isertitseriartarpugullu. Ålandimiut sakkortuumik unammipput, uagullu aamma takutittussaavarput saperata. Unammisartut unammilluaqaat, sakkortuumik pissusissallu malilluarlugit, angutit nunanut allanut unammisartut sungiusaasuat Tekle Ghebrelul unamminerup kinguninngua Sermitsiaq.AG-mut oqaluttuarpoq.

Ajugaaqqaarnertillu nuannaarutigaa.

– Ajugaalluni nuanneqaaq. Arsaattartut ajugaarusussimaqaat. Menorcamut unamminitsinnit kukkusarnivut annikinnerpaatinniarsimavagut. Kinguarsimasuvut aalajangersimapput målmandi ullumi eqqissisimaassasoq, taamaapporlu. ilami suliassaqanngivissimavoq, taamaattumik nuanneqaaq, nunanut allanut unammisartut sungiusaasuat nuannaarluni oqarpoq.

Kalaallit ullumi Saaremaa unammissavaat.

Powered by Labrador CMS