Folketingi
Arraa - IA taaseqatigiinnissamik isumaqatigiissut avaqqullugu taasisoq
Folketingip siulittaasussaata Pia Kjærsgaardip qinerneqarnerani IA-meersoq Aaja Chemnitz Larsen siunnersuut akerleralugu taasivoq. Tamannali Folketingimi saamerlernut isumaqatigiissummik unioqqutitsineruvoq
Folketingimut ilaasortat Atlantikup Avannaaneersut sisamat tamarmik Folketingimi saamerlernik 'taaseqatigiittarnissamik' taasamik atsiugaqarsimapput.
Taamaalilluni taasisoqarnerata nalaani Folketingip ataatsimiittarfiata avataaniissinnaaneq pisinnaalerpoq. Ilaasortat ataatsimiittarfimmi inuttut namminneq taaseqataajumagaangamik tamanna Socialdemokratinut taaseqatigiittarnissamik isumaqatigiissummik ataqatigiissaarisuusunut ilisimatitsisassapput, Folketingimi Socialdemokratit ilisimatitsipput.
- Taaseqatigiittarnissaq pillugu tamakkiisumik ilisimatinneqarsimanngilanga, Socialdemokratillu ataatsimiinnerup aallartinneraniit minutsit 20-t ingerlareersullu tamatuminnga ilisimatitsisariaqarsimapput, Aaja Chemnitz Larsen periaatsimik isornartorsiuivoq.
Atuaruk:Doris Jakobsenip DF-imut sioorasaarut peqqissimissutiginngilaa
Atuaruk: Siumumit taperserneqarluni: Pia Kjærsgaard Folketingimut siulittaasunngorpoq
Pia Kjærsgaard akerlilerlugu taasisoq
- Allattoqarfiga ajornartorsiummik tamatuminnga siunissami eqqumaffiginninneroqqullugu soorunami qinnuiginiarpara, Aaja Chemnitz Larsen Sermitsiaq.AG-mut oqarpoq.
- Taasinera Folketingimi inatsisilerinermut allattoqarfik naapertorlugu atuuppoq. Socialdemokratit Pia Kjærsgaardip siulittaasunngornissaanik inassuteqarnerat tunuliaqutaaffigisinnaanagu saamerliit juulip aappaani allakkatigut ilisimatippakka, Inuit Ataqatigiit sinnerlugit Folketingimut ilaasortaq nassuiaavoq.
- Siunnersuullu akerleralugu taasivunga, isumaqarama Folketingip sulinerata siulersornissaanut inummik katersuuffiusumik pisariaqartitsisoqartoq, Aaja Chemnitz Larsen nassuiaavoq.