Skip to main content

Arpalluni unammineq ilungersunarluinnartoq kalaallip angutip peqataaffigaa

264,8 kilometerinik isorartutigisumik arpalluni unamminermini Lars Elgaard Larsenip peqataaffigisani 36 tiimit ataallugit anguaa

Isorartoorujussuarnut arpattartoq Lars Elgaard Larsen nunarsuarmi arpalluni unamminerni sakkortunersaattut taaneqartartumut, Spartathlonimut, peqataaqqammerpoq. Tassami 265,8 kilometerimut unamminermut peqataagami.

Grækerit Nunaanni illoqarfiit pingaarnersaannit Athenimit illoqarfeeqqap tungaanut Spartimut arpaqataavoq. 

- Spartathlonimut peqataaniarneq ajornaatsuinnaanngilaq, tassami anngunnissamut piumasaqaatit sakkortuupilussuupput. Peqataassagaanni 100 kilometerit akunnerit qulit ataallugit arpattoqartariaqarpoq, imaluunniit 100 milesini arpannermi akunnerit 21-t ataanneqartariaqarlutik. Morsimi ukioq kingulleq 100 milesit akunnerit 18-it arpakkakkit Spartathlonimut annguppunga, Lars Elgaard Larsen oqarpoq.

Silarluup ataani unammineq

Spartathlonernermi qatsissukkut arpattoqartarpoq, tassani qaqqaq 1.200 meterinik qatsissuseqartoq qaqineqartarluni. Aamma Spartathlon naammassissagaanni akunnerit 36-it ataallugit naammassineqartariaqarpoq, taamaanngippat peqataasut anisinneqartarlutik.

- Ukioq manna unammineq sakkortuneruvoq, tassami anorersuarlunilu sialussuarpoq, kalaaleq arpannermik nuannarisalik oqarpoq.

- Unnuakkut qaqqaq qaqigakku ingerlalluaraluarpunga, tassanngaanniilli aqqutaa sinnera ilungersortupilussuuvunga. Tassami anorersuarlunilu sialussuarpoq. Peqataasorpassuit qiianertik pissutigalugu unittut amerlapput. 

Apuunnissani pingaartikkaa

- Akunnerni 25-ni sialussuup ataani arpappunga, isikkakka masattuinnaapput, arpalluni soorlu tassa lego-t tullaariinnarlugit. Unali peqataaffigisara naammassiniarlugu sukataartupilussuuvunga, oqaluttuarpoq.

Arpalluni unammineq sakkortuupilussuaq Lars Elgaard Larsenip naammassivaa, tassani akunnerit 36-it minutsillu 33-it atorlugit apuulluni.

- Apuulluni nuannertorujussuuvoq, ingammik Spartip aqqusernga naammassiffigalugu misigissuseq imaannaanngilaq, oqarpoq.

Unamminermi arpattartut 403-it apuupput, tassani Lars Elgaard Larsen 337-isut inissilluni.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER