Arpaffissat naallugit arpapput

Arfininngormat arpattut isiginnaartullu silagissiortinneqarput Narsami Brugsenip arpatsitsinera ingerlanneqarmat. Naammaginartumik kiappoq anorsaannguaannarlunilu. Illoqarfimmi sumiiffinnit assigiinngitsunit marlunnit aallarluni 3,5 aamma 10 kilometerimut arpattoqarpoq, arpaffinnilu tamani Brugseni apuuffissaalluni.

3,5 km-imut ajugaavoq Nuunu Brandt, atorlugit minutsit 19-it.
Normu 2-ngorpoq Wolle Isbosethsen atorlugit minutsit 20 1/2, normu 3-ngorporlu Milan Pape, normu 2-mit sekundinik 17-iinnarnik kigaannerulluni.
10 kilometerimut ajugaavoq Bent Salling, atorlugit minutsit 38-t sekundillu 53-it, normu 2-ngorluni Katti Frederiksen atorlugit minutsit 42-t sekundillu 23-t.
Normu 3-ngorpoq Klaus Ludvigsen, atorlugit minutsit 48-t sekundillu marluk.
Brugsenip saavani nuannisartoqarluarpoq, paarnanik nutaanik aammalu savaaqqamit kotellitsinik pølsinillu tuniniaasoqarluni, kiisalu aaqqissuussinerup ingerlanerani nipilersortoralugit Oleeraq Nielsen & Co.
Arpannerup nalunaaqutaq 13.00 aallartinnera ilutigalugu arsaattarfimmi qanittumiittumi arsaallutik sungiusaatigalugu unammipput Qaqortoq Narsarlu.
Arparttut inunnit suaartarlugit kajumissarneqarlutik apuussuleruttortut arsaattarfimmit nillerrappallattoqarpoq, Narsaq arsaannermi akeqqatoqqaminut Qaqortumut isertitsimmat.
Arsaanneq 1-1-imik inerneqarpoq.