Arpaartit: Sexchikane ullutsinni - sumut killeqassava?

– Inuit assigiinngitsuuvugut, ilaat ammanerupput, ilaallu imminnut killissaqartittarlutik.
Taamatut oqarput Naligiissitaanermut Arpaartit, taakkualu sexchikane oqallisigeqquvaat, nunanilu tamalaani arnat ulluat, marsip 8-at, atorpaat sammisassap tamatuma saqqummiunneranut.
Kajumissaarut aamma tunuliaqutaqarpoq Sermitsiaq.AG-mi tallimanngormat allaaserisamit, Kalaallit nivissat nukappissallu atisaqanngingajallutik imminnut nittarsaapput, ilaatigut oqaatigineqarluni meeqqat 18-it inorlugit ukiullit atisaqaratik assiminnik Facebookimut ilisisartut.
Ilaatigut Naligiissitaanermut Arpaartit mianersoqqusipput, pingaartumillu angajoqqaat kajumissaarlugit qitornamik Facebook-imi saqqummiussaat arajutsinaanneroqqullugit.
– Ulluinnarni nalunngisariit ikinngutigiit suleqatigiit nunaqqatigiillumi akornanni quiasaarutigalugu qeerleraaneq. Qularnanngitsumik arlallit tamanna pisussaannartut isigalugu misigisareerpaat. Suleqammit, nalunngisamit imaluunniit ilisarisimanngeqqinnaakkamit facebookikkut, sms-ikkut allatigulluunniit qaninniartumit, nuannarinnittumit tiingarusuttumit allaffigineqarneq. Suliffeqarfiup iluani imminut sammilluni qaninniarneq. Kisianni taakkua sexchikanetut naliligassaappat? Aap imaluunniit naamik. Akissut ataasiinnaanngilaq, qularnanngilarli arlallit taamaaliorneqarnermikkut killigititartik qaangeraat. Inuimmi assigiinngilagut, ilaat ammanerupput ilaalli killeqarnerullutik, Naligiissitaanermut Arpaartit allapput.

Niviarsiaqqat imminnut tuniniartut
Facebookimi ullormut nutaarsiassat malinnaaffigilaassallugit iseraanni ulluinnarsiutaalersimasatta ilagaat niviarsiaqqat, inuusuttuarannguit atisaqarpiaratik assiminnik ilioraasimasut. Nutaajunerusorli tassaavoq immikkut gruppeliorsimaneq atisaqanngivissortunik, ilaasa quarsaarutigaat allalli paquminartunik "ammaaniarnertut" isigaat. Ataaserli qularnanngilaq, niviarsiaqqat ilaasa 18-ileeqqajanngitsut nuannarineqarnerminnik kusagineqarusunnerminnilluunniit malugitinneqarniarlutik assiminnik ilioraanerat kingunerlorujussuarsinnaammat.
Naligiissitaanermut Arpaartit sianigeqquvaat assinik taamaattunik tamanut saqqummiussinikkut erloqinartumik kinguneqarsinnaasoq naatsorsuutigineqartarunanngitsoq.
– Taama ammatigaluni assinik ilioraanermi eqqarsaartigineqartarunanngilaq anguterpassuit, inuusuttut utoqqaanerillu, killissaminnik qaangiillutik qaninnialersarnerat. Ilami angutit utoqqaanerujussuit qaninniarsarisarnerat, immaqalu malersuilertarnerat. Assit internetimut ilineqarsimasut qaqugumorsuaq piusussaapput, niviarsiaqqanullu aamma arnanut taamaaliorsimasunut inuunerup sinnerani ajoqusiisinnaanerat tamatigut eqqarsaatigineqartannginnerat eqqarsarnartoqartupilussuuvoq. Angajoqqaallu eqqumaniarnissaat pingaaruteqarluinnarpoq.

Inatsit
Naligiissitaanermut Arpaartit erseqqissarpaat pingaaruteqartoq inuusuttut killiliisarnissaat.
– Tiinganiarsarinerup (sexchikanerinerup) akuerineqannginnissaa Naligiissitaanermut inatsimmi nutaami Inatsisartuni ukiaq akuerineqartumi ilanngunneqarpoq. Tamatuma saniatigut pinerluttaalisitsinermi inatsimmi ilaavoq. Taakkunanili ersarissumik allanneqarsimanngilaq, qaqugukkut sexchikane sexchikanetut taaneqarsinnaalernersoq. Taamaattumik pingaaruteqarpoq illit killissarititavit ilisimaarinissaa, qaninngoorniarneqarnermilu killissavit sumiinnerata paasissutiginissaa.
– Qeerleraaneq nunatsinni ileqqussaannartut isigissavarput? Qaqugukkut nuannerunnaartarpa? Suliffeqarfinni ileqqoq taanna ingerlanneqaannassava? Niviarsiararpassuit ukiukitsut atisaqarluaratik imminnullu kusassarujussuarsimallutik takusassiarisarnerat akuerineqaannassava? Angajoqqaat kaammattorusuppatsigit meeqqasi internetip silarsuaani sulerisarnerinik oqaloqatigilluaqqullugit. Imminut takutitassiarineq siunissami kinguneqarnerlussinnaammat. Pingaarnermilli niviarsiaqqat anguterpassuarnik like-rneqarumanerminni sexchikanemik eqqugaasinnaanerat qaninneerarsuusarmat, Naligiissitaanermut Arpaartit allapput.